النطه

في قصر الرئاسه , يدخل كيرلس و اسفنجه و صديقهم قطه لمكتب الرئيس .. 

السيسي : جيت في وقتك يا كيرلس ,, جهزت لي الشباب اللي قولت لك عليهم ؟؟

كيرلس : اه يا ريس , اعرفك .. ده اسفنجه صاحبي .. شاب لياقه بدنيه و نشاط مقولكش يا ريس . و حد صاحب صاحبه اوي ,,, و ده قطه برضه صاحبنا , موقف سجاير بقي له شهر و مبيت في الجيم بقي له اسبوع ..

السيسي : طيب تمام , انا مش عارف يا شباب , كيرلس قالكوا علي الموضوع اللي انا عاوزكوا فيه و لا لأ ؟؟

اسفنجه : لا يا ريس , هو بس قالنا الريس عاوز شباب معاه و احنا متأخرناش .. 

السيسي : تسلموا يا رجاله , انتوا طبعا شوفتوني امبارح و انا راكب عجل مع الفنانين و الوزرا تحت دعوه تشجيع الرياضه و توفير العربيات و كده , و الموضوع الحمد لله سمع و عمل شغل , فحنعمل حاجه زيها الاسبوع اللي جاي , بس مش بالعجل , لا حنط بالباراشوطات ؟؟ و حيكون معانا الفنانه فيفي عبده و الفنانه نبيله عبيد .. فايه رأيكوا تبقوا معانا ؟؟ 

اسفنجه (بعد تفكير ) : اصل الصراحه يا ريس , مكناش نعرف ان الموضوع كده , غير افرض حصلنا حاجه و احنا بنط ؟؟

السيسي : متخفوش , حزوركوا في المستشفي .. و اجيب لكوا ورد , اي اسئله تاني ؟؟

اسفنجه : طب معلش برضه بس احنا حنط فين ؟؟ 

السيسي : المره ديه احنا حنشجع السياحه , فنحط فوق الامكان السياحيه , زي الاهرامات , مسله المطريه , برج القاهره .. 

اسفنجه : ما ديه يا ريس , لو حد وقع عليها ممكن يتعور ؟؟

السيسي : يتعور ايه يا ابني ؟!! ده حيتفشخ !! و عشان كده , بنقول عاوزين رجاله , وحوش , أسود ... فانتوا ايه نظامكوا ؟؟ قد المسؤوليه ديه ؟!

اسفنجه : طب معلش يا ريس , لو البراشوط فسا في الجو , حنعمل ايه ؟؟ 

السيسي : متخفش , حيكون في براشوطات اضافيه مع الفنانه فيفي عبده , لو حصلكوا حاجه في الجو , ابقوا خدو منها او امسكوا فيها عادي .. حاجه تاني ؟؟ 

قطه (يخرج عن صمته ) : طب بالصلاه علي النبي , الطلعه ديه حنتحاسب عليها ازاي ؟؟ باليوم و لا بالنطه ؟؟

السيسي : انتوا و شطارتكوا لو وصلتوا الارض احياء و عاوزين تطلعوا تنطوا تاني , الكلام حيبقي مختلف , بس انا عشان خاطر كيرلس و عشان عارف انكوا شباب مصري بيبحب ماسر بجد , حنديكوا في اليوم خمسين جنيه و وجبه ربع فرخه و طبق رز و سلطه و حاجه ساقعه .. 

كيرلس : يلا يا رجاله ؟؟ قولتوا ايه ؟؟ عشان الريس عاوز يسمع كلمه نهائيه 

قطه : طب هو حيكون في حريم , حتنط معانا ؟؟

السيسي : مين ده ؟!! انت يا ابني مسطول ؟؟ مش لسه قايل الفنانه نبيله عبيد و الفنانه فيفي عبده حتنط معاكوا ؟؟ 

قطه : مينفعش مريام الفارس تنط معانا و انا اجي من غير وجبه ؟؟ 

السيسي : لا مريام فارس و ناسني عجرم حيكونوا معانا في الاسبوع اللي بعده في العوم في النيل , لو اتجدعتنوا و عملتوا النطه صح , حجيبكوا معانا بعد كده , 

قطه : خلاص , انا تمام 

اسفنجه : طب هو ممكن اجيب امي تقعد معايا في الطياره فوق و تشوفني و انا بنط 

السيسي : هاتها يا ابني .. محدش عارف ايه ممكن يحصلك بعد النطه ؟؟

اسفنجه : ايه يا ريس ؟؟

السيسي : هاتها .. هاتها , و اهو بالمره اطلعها حج و عمره اول ما اشوفها , يلا سيبوا بطايقكوا مع كيرلس و هو حيظبط الموضوع 

قطه : باشا .. انا معيش بطاقه 

السيسي : باسبور ؟؟ اي كارنيه نادي ؟؟ اي اثبات شخصيه ؟!! 

قطه : ولا اي حاجه خالص ... 

السيسي : مش مشكله .. حنبقي نطلع لك بطاقه و يبقي كيرلس ياخدها منك .. اتفضلوا دلؤتي و نشوفكوا ساعه النطه ..