جون براون ...
بالرغم من انه كان ابيض ..و لكنه كان من اشرس المدافعين عن حق السود في الحياه الكريمه و تحريرهم من العبوديه ... جون براون خاض معارك كتير عشان خاطر السود و كان له دور كبير جدا في تهريب عبيد كتير و حمايتهم ...... المثير في قصه جون براون , مش انه ابيض بيناضل عشان حقوق السود , المثير هو ازاي جون براون مات ؟!!
سنه 1859 , جون براون هاجم قاعده عسكريه كبيره و كانت بتضم عدد محترم من العبيد السود .. جون براون كان معاه حوالي 20 فرد بس اثناء الهجوم , معتمد ان العبيد اللي في القاعده العسكريه ديه , بمجرد ما يشوفوه جاي يحررهم , علطول حيخلصوا نفسهم و يساعدوه !! بس اللي حصل ان خوف العبيد كان اقوي من شجاعه جون براون و باعوه ...! , لغايه ما اتقبض عليه و اتحكم عليه بالاعدام شنقا , بعد يومين من الصمود و الثبات !! ...
و نرجع نسأل نفسنا , نفس السؤال الوجودي ؟!! هو جون براون عمل كل ده ليه ؟؟ ايه السذاجه اللي هو كان فيها ديه ؟! ليه يحارب حرب مش حربه من الاساس ؟؟ هو ماله اصلا ؟! هو راجل ابيض عايش زي الفل و مريح دماغه ؟؟ حتي و لو عاوز يعمل طيب , بلاش انتا تشارك في العبوديه ديه .. بس تناضل و تحارب و تعرض نفسك للخطر و الموت , عشان مين ؟!! يا تري كان سعيد و هو رايح حبل المشنقه عشان خاطر ناس مستسحقش تعبه و نضاله ؟؟ هل كان راضي عن حياته اللي ضايعها عشان اوهام و خرافات كانت معششه في دماغه ؟؟...
مشكله الناس اللي زي جون براون , ان بتصبهم لعنه ... اسمها لعنه الانسانيه ! لعنه عامله زي السرطان بتنتشر في ضمايرهم و مبادءهم ! لعنه بتخليهم بيحسوا بكل ألم يتعرض له اي انسان , يمروا بكل لحظه ظلم يمر بيها اي انسان , يعيشوا و يفكروا و يتعاملوا انهم ضمن كيان واحد اسمه انسانيه , من حق كل افراد الكيان ده انهم ينعموا بنفس مقدار السعاده و الحقوق ... فيبقوا زي الهبل نفسهم يوصلوا للهدف الاسطوري ده ,,, و مشكله اللعنه ديه انها بتنزع من جواهم اي خوف او رعب , بتخليهم زي المجانين مش فارقه معاهم حياتهم او ارواحهم ... موتهم مش موت الجسد او تعذيب الماده , انما موتهم هو فشلهم و هروبهم من مواجهه اللعنه ديه ... ! جون براون مات , و العبيد اللي رفضوا يساعدوه برضوا ماتوا , اه عاشوا خمس , عشر , عشرين سنه زياده عنه ... بس هو مات سيد , و هما عاشوا عبيد ...
No comments:
Post a Comment