في الساحه امام الجامع .. يوم صلاه الجمعه ,
كيرلس يهمس في اذن اسفنجه : انت متأكد ان عادي اقعد هنا ؟؟
اسفنجه : اه يا عم عادي ... انت مش جاي مع واحد هاوي لامؤخذه , غير مش انت كل شويه تزن و تقولي عاوز تحضر خطبه جمعه , عاوز تحضر خطبه جمعه ؟؟ اهو يا عم احضر خطبه جمعه .. اقعد بقي ..
ثم فجأه يسمعون في مذياع الجامع الشيخ بصوت عالي غاضب :
ايوه حتدخل النار !! انت ياللي بتتكلم و مش مركز في الصلاه حتدخل النار !! و انت ياللي جنبه بتتكلم معاه برضه حتدخل النار !! و انت ياللي جنبهم هما الاتنين و مش بتقولهم اسكتوا برضه حتدخل النار .. و انت ياللي شايف التلاته دول و ساكت عنهم حتدخل النار !!
كيرلس : ما تيلا يا عم نمشي قبل ما الراجل بتاع الكشك اللي هناك ده يدخل النار ؟!
اسفنجه : اتقل يا ابني .. انت ليه محسيسني ان ديه اول مره تحضر فيها خطبه جمعه ؟؟
كيرلس (باستغراب ) : عشان فعلا ديه اول مره احضر فيها خطبه جمعه !!
اسفنجه : تصدق صح ,, بس عادي يعني ,, ما انا كمان برضه ديه اول مره احضر فيها خطبه جمعه
كيرلس : وحياه امك ؟!
اسفنجه : مش اول اول يعني .. علي العموم هو خلاص قرب يخلص ..
ثم فجأه يقول الشيخ من خلال المذياع : و انت يا مواطن يا مصري لازم تشارك في الانتخابات عشان متدخلش النار !! اختار اللي حيجيب لك استقرار .. اللي حيجيب لك امان .. اللي حيجيب لك خير لبلدك .. غير كده تبقي عاصي لواجبك الوطني و تستاهل تدخل النار !!
ثم اثناء الخطبه يقوم احد الجالسين : المشاركه في الانتخابات تحت ظل الانقلاب حراااام و يسقط يسقط حكم العسكر !
كيرلس يهمس في اذن اسفنجه : قعد الراجل ده بسرعه قبل ما يدخل النار !!!
فيقوم واحد اخر و يقول : السيسي قاتل .. السيسي خائن !
فتحدث هرجله في الساحه , لينزل الشيخ من المنبر و يتجه لهم
الشيخ : ايه الدوشه ديه !! مش عاجبكوا الصلاه !! بتصلوا ليه ؟؟ يا ارهابين يا خونه
احدهم : انت شيخ امن دوله اصلا !! و بيوت الله مش ساحه سياسيه
الشيخ : و هو انتوا اصلا بتعملوا احترام لبيوت الله .. يا قتله ؟؟
ثم ينظر لكيرلس , و يسأله : انت شكلك يا ابني كنت متابع الخطبه من الاول ؟؟ انا قلت حاجه غلط ؟؟
كيرلس (يتلجلج ) : لا يا قداسه الشيخ .. قصدي لا يا حضره الشيخ .. قصدي لا يا فضيله مولانا الشيخ ..
احد الاشخاص لكيرلس : تلاقيك حزب النور !! ما انتوا كلكوا حاجه واحده !!
كيرلس : حزب النور ايه حضرتك ؟؟ .. (ثم يتجه لاسفنجه ) ما تركز مع آمي شويه , الله يخرب بيتك ؟؟
اسفنجه : يا جدعان كلنا مسلمين في بعض (فينظر له كيرلس ) و ساعات بيبقي فينا مسحيين (فينظر له الشيخ و الواقفين) .. قصدي يعني اننا من الاخر مصريين .. فمينفعش كده و الله .. يعني طول عمرنا بنصلي في الجامع عمرنا ما اختلفنا كده , ليه دلؤتي بقينا نختلف و نخون بعض ؟؟ ده شيطان يا اخونا دخل بينا !
الشيخ : قولهم يا ابني !! عيب عليكوا ما تبقوا رجاله كبار و يجي شاب زي ده هو اللي ينصحكوا .. اللهم قوي ايمانكوا يا ولاد ! اساميكوا ايه بقي ؟؟ انت يا رفيع شويه شكلك محمد و انت يا مليان حبه شكلك خالد , صح ؟؟
اسفنجه : لا يا شيخنا , هو اللي خالد و انا اللي محمد ..
كيرلس يهمس لاسفنجه : طب مش يلا يا محمد , عشان اتأخرنا علي حمله التبرع بالدم ؟
اسفنجه : ما تستنا شويه يا خالد , لما نتأكد ان النفوس صفيت و الناس رجعت لبعض ؟
كيرلس : لا يا محمد !! مينفعش نتأخر علي الحاجات ديه !! , ديه واجب علي كل مسلم تجاه اخيه المسلم !! و لا انت عاوزنا نروح النار ؟!! ما تقوله حاجه يا شيخنا !
اسفنجه : استنا شويه يا خالد .. انا مش عاوز اسيب الشيخ الصراحه , ده انا ما صدقت لاقيت شيخ بيتكلم بالايمان و الحكمه ديه
كيرلس يقترب منه : ده انا لما حطلع برا حفشخك انت و ايمان نفسها !! ...... طب خلاص يا محمد , حسيبك انا دلؤتي تقعد مع شيخنا , عشان لسه حعدي علي ملجأ ايتام براعم النور اقعد مع الاطفال هناك شويه , خلص انت و نبقي نتقابل بعدين بقي ..
اسفنجه : لا مدام حتعدي علي الملجأ نروح مع بعض بقي .. متأمرنيش باي حاجه يا شيخنا ؟؟
الشيخ : لا يا اولادي , بس يا ريت نبقي نشوفكوا كتير .. انتوا بجد فخر لشباب المسلمين و بالذات انت يا واد يا خالد ..
يبتسم كيرلس ابتسامه بسيطه
الشيخ : و فكروا كده تبقي تيجوا تدوا لاطفال الجامع دروس قراّن ؟؟
كيرلس : ده اكيد يا شيخنا !! انجز بقي يا خالد , قصدي يا محمد , عشان نلحق نشتري للاطفال حبه لعب و حلويات ! قبل ما نروح لهم .. سلامو عليكوا يا شيخنا
الشيخ : و عليكم السلام يا ابني .. يا رب , اللهم أكثر من امثال خالد و محمد في صفوف شباب المسلمين ..
No comments:
Post a Comment