دخلت الجبنه المحكمه , مكسوره و راسها لتحت .. ماشيه وسط الناس و كله عمال يبص عليها , يتكلم عن شكلها و منظرها , .. لحد ما قعدت , و خوف و القلق مش راضين يسبوها , مش عارفه ايه اللي حيحصل ؟ مش حاسه ان حد معاها , حاسه انها لوحدها ! .. و اخيرا وصل القاضي , كله وقف , و حست بامان اول ما سمعت القاضي بيقول , ..
القاضي : و باي حق يا فار يا محترم تسمح لنفسك تتعدي علي جبنه مش جبتنك !!؟
الفار : انا يا سياده القاضي , اول ما شفتها مقدرتش امسك نفسي ! .. لونها الاصفر الجميل شدني .. تخيلي و هي في بوءي خلاني مش علي بعضي .. ملمسها الناعم الدهني خلاني مش قادر اقاومها ! .. رحت غصب عني قطمت منها حته و جريت ! .. بس اعمل ايه سيادتك انا فار غلبان و هي اللي شدتني !
القاضي : و الدفاع عنده حاجه عاوز يقولها ؟!!
الفار (المحامي ) : شكرا يا حضره القاضي ,, الموضوع بسيط جدا , موكلي فار ضعيف كان ماشي عادي جدا .. شاف قدامه حته جبنه عريانه ! فمقدرش يقاومها و حصل اللي حصل ! , يبقي مين المذنب سعادتك ؟! هو اللي كان ماشي عادي و لا هي اللي كانت نازله الشارع عريانه و منظرها بيخلي اللي مش عاوز يعملها حاجه , يعملها ؟!!!
تصرخ الجبنه المسكينه : لا انا مكنتش عريانه !! ده هو اللي هجم عليا و ...
يقاطعها محامي الفار و يزعق فيها : اخرصي !! لا كنتي عريانه !! داري كل جسمك يا اختي !! و لا انتي فرحانه بيه ؟؟ مخبيه نصه و معريه نصه ؟!!! الجبنه المحترمه اللي عاوزه تحافظ علي نفسها متحطش نفسها في موقف زي كده , !! اما الجبنه اللي نازله من بيتهم و هي عاوزه تبقي في الموقف ده !! منظرها و شكلها بيسمح اي حد يعمل كده !!
قلق و هرجله في قاعه المحكمه , الجبنه بتعيط بانيهار , الجموع بتأيد الفار المجرم و كلهم بصوت واحد (عاقبوا الجبنه العاهره ! ) .. ثم فجأه يتكلم القاضي ,
القاضي : هدوء انتوا في محكامه !!! ...
المحامي : انا بطالب سعادتك يا حضره القاضي مش مجرد تنظر لموكلي علي انه ضحيه ! لا تنظر لكل فار مكانه انه هو كمان ضحيه , ضحيه و لازم احنا نحميه .. فانا بطالب سعادتك تأمر بقرار لتحجيب كل قطع الجبنه في البلد !! , بدل ما منعرفش نتحكم في الفيران شبابنا و الدنيا تبوظ في الشوارع ! .. و الجبنه اللي مترضاش تتحجب , خلاص يبقي هي مسؤوله بقي عن اللي حيحصلها ..
الجبنه : بس كده يبقي ضد اي حقوق و حريه ! انتوا كده بتجبرونا .. بتقيدونا !
المحامي : لو مش عجبك ,, يبقي خلاص متنزليش من بيتك ! خليكي قاعده , معززه مكرمه , انا مش عارف ابوكي و لا جوزك و لا اللي مسؤول عنك بينزلك الشارع ليه اصلا ؟؟
الجبنه : انا ولدي متوفي و مش متجوزه و لازم انزل اشتغل .. و حنزل اشتغل ! مش حتقعدونا في البيت و لا حتلبسونا علي مزاجكوا ..
المحامي : حتعلمي ايه يعني ؟؟! اوعي الحماسه تاخدك و تفتكري انك تقدري تمشي الكون ده كله علي مزاجك .. اوعي تنسي انك في الاخر حته جبنه ! اتولدتي جبنه و حتموتي جبنه ..
القاضي : انا شايف اننا ممكن نلم الموضوع , و الجبنه تتنازل عن القضيه و خلاص
المحامي : انا بقي مش حتنازل يا حضره القاضي عن صدور قرار بتحجيب كل جبن البلد !
و فجأه بعلو صوته ابتدي ينادي " تتحجب .. تتحجب " و القاعه كلها تنادي وراه و تزعق زيه ! الوضع بقي عامل زي مظاهره جوا القاعه , القاضي نفسه مش عارف يسيطر عليها و الفوضي كانت فظيعه لدرجه ان في ناس قامت عشان تتهجم عن الجبنه .. و وسط المشهد ده , راح المحامي مطلع من شنطته حجاب و رماه لجبنه و زعق فيها "استري نفسك ! " ! , فلبسته من الخوف و الرعب ,! .. بعد ما لبسته , نادي عليهم بعلو صوته "خلاص لبسته !! اهدوا يا جماعه !! , خلينا نحترم قاعه المحكمه و نعرف انها حتنفذ العدل ! " و قرب من الجبنه و هي بتترعش من الخوف و الدموع ماليه عنيها و همس في ودنها .. :
شاطره .. برافو عليكي .. عرفتي بقي ان في الاخر مش انتي اللي بتقرري .. عرفتي حجمك و وضعك الحقيقي , عرفتي انك في الاخر جبنه موجوده بس عشان تتكلي ! لعلمك انا مش مستفيد حاجه من انك تلبسي او تقلعي ! بس كنتي لازم تتحجبي دلؤتي , عشان اي جبنه تاني تمر بموقفك ده تفكر تاني قبل ما تشتكي , قبل ما ترفع قضيه , قبل ما حتي تحاول تتكلم !! تعرف انها لو فكرت مجرد تعترض ... لا ديه مش حتاخد حقها لا ده كمان حيتاخد منها حريتها ! و ياريت المره الجايه لما فار يعمل معاكي اي حاجه , سيبه يعملها بهدوء و بدون شوشره !! توقفي ساكته لغايه ما هو يخلص كل اللي هو عاوزه و بعد ما يخلص ! هو اللي يسيبك و يمشي !! بوءك ميتفتحش و عنيك تبقي في الارض ! .. و لو نسيتي كلامي ابقي حسيسي علي الحجاب حتفتكريني ... !
No comments:
Post a Comment