لوحه "شمشــون و دليـلــة "
للفنان الهولندي " بيتـر بـول روبنــز "
حسب الديانه اليهوديه و الروايه المذكوره في التوراه .. شمشون ده كان رجل قوي جدا و الله اداه موهبه القوه ديه , بس كان شرط انه يحافظ عليها انه ميحلقش شعره خالص !! شمشون كان بيدافع عن اليهود شعب الله المختار - حسب التوراه- و ده كان عامل قلق لاعداء اليهود , فعرفوا ان شمشون بيحب واحده اسمها دليله .. و اتفقوا معاها انها لو عرفت سر شمشمون حيدوها مقابل مادي او حيكفئوها و خلاص ..
اللوحه ديه بتوصف لحظه تسليم دليله لشمشون , بعد ما صرح لها بسر قوته انها في شعر ! هي راحت قالت لاعداء شمشون علي السر , فاتفقوا معاها انها في يوم من الايام و هو عندها في البيت تنيمه و هما حيجوا يقصوا شعره ده و يقبضوا عليه .. و فعلا ده اللي حصل , بس في كام ملاحظه في اللوحه يمكن الفنان عاوز يوضحها :
1- دليله مش فرحانه بالعكس ديه عنيها لتحت و الفنان راسمها عاريه الصدر , دليل علي العار و الانكسار .. عاوز يوضح ان بالرغم من اللي هي عملته هي حاسه قد ايه كميه الوضاعه و الحقاره في انها تسلم حد حبها بالشكل ده !! و مع كده مش سامح للمشاهد انه يتعاطف معاها او حتي جايبها في منظر انها كانت تحت ضغط او حاجه , يمكن ايدها اللي علي شمشون ديه ممكن تكون دليل بسيط علي انها ندمانه , بس بعد ايه ؟؟!
2- شمشون نفسه .. نايم علي حجرها , زي الطفل !! الشمشون الجبار اللي كان عامل القلق ده كله , نايم علي حجر دليله ... اه كان بيحبها , ان كان مصدقها , اه قالها علي سر قوته ! بس ديه مش طيبه , ديه سذاجه و يستاهل كل اللي حصله من قبض و اهانه و تعذيب !! شمشون مدفعش تمن حبه , شمشون دفع تمن تفاهفته و شهوته الجسديه !! حتي شمشون ميصعبش عليك كمشاهد ,
3- الست العجوزه اللي ورا دليله , ملهاش اي دلاله غير انها رمز لل"شماته !! " شماته الواقع في الحدث ... كان ممكن يجيب الفنان اي حد من العساكر اللي واقفين برا يشيلوا الشمعه عشان الحلاق يقص شعر شمشون , بس اختار ست عجوزه شكلها وحش عشان يعبر عن مدي دراميه المشهد الحزين , نهايه العلاقه ديه اللي كانت بسبب خيانه دليله و سذاجه شمشون ... و حتي الالوان الصوره و الاضاءه ... اشبه بمشهد جنائزي ..
اللوحه ديه من اروع اللوح اللي عبرت عن الرومانيسه البسيطه في اذكي اشكلها .. يمكن لو في جمله لازم تكتب علي اللوحه , ممكن تكون :
"الحب يحيي اما الشهوه فتقتل ! " ... اعتقد ان في القصه ديه شمشون عمره ما حب دليله بجد و لا دليله حبت شمشون برضه بجد , الموضوع كان عباره عن علاقه منتفعه بين الاتنين و عشان كده انتهت بانهيار الاتنين ..
No comments:
Post a Comment