في نهار احد ايام رمضان .. قبل ميعاد الافطار بساعه .. اسفنجه و كيرلس في الشارع , يقومون بتجهيز التمر و العصائر لاعطاء الماره ساعه
الافطار ..
اسفنجه : شكرا بجد يا كيرو , انك نزلت توقف معايا ..
كيرلس : انت بتقول ايه يا اسفنجه ؟؟ يا ابني انتا اكتر من اخويا
اسفنجه : انت عارف ؟ انا نفسي بس بتوع المسيحين اعداء الدين و المسيحين خونه و الكلام ده ؟؟ يجوا يتفرجوا عليا و عليك , والله يا كيرلس عمري ما حسيت انك مسيحي او انا مسلم او حاجه من الحاجات ديه ..
كيرلس : صدقني و لا انا اسفنجه
اسفنجه (مبتسما ) : حبيبي يا كيرو و الله
(بعد خمس دقائق )
كيرلس : ايه الجو الحر ده يا جدع !! ربنا يكون في عونكوا بجد .. بقولك ايه , هو انت جايب ايه معاك ؟؟
اسفنجه : جايب تمر و صوبيا و قمر دين و مانجا ..
كيرلس : الله ! انا عمري ما دقت التمر , ممكن لو طبعا مفهاش زعل ادوقه , مجرد شفطه كده ؟؟
اسنفجه : اوي اوي , اتفضل
كيرلس : حبيبي .. ايه ده ؟!! هو , انتا مش جايب تلج ؟؟
اسفنجه : لأ مش جايب , بس هو ساقع
( كيرلس يشرب كوب كامل من التمر , وسط نظرات اسفنجه مستغربه الموقف )
اسفنجه : ما تاكل الكوبايه البلاستك بالمره , ايه ده يا كيرلس يا حبيبي ؟؟
كيرلس : معلش يا اسفنجه , بس اصل الجو حر فشخ و كنت عطشان .. ربنا يكون في عونكوا بجد
اسفنجه : خلاص يا عم هانت فاضل ساعه , .. و حنقضيها مع بعض , فمش ححس بيها
كيرلس : عيب يا اسطا , انا مش حسيبك لوحدك غير علي الفطار ,
اسفنجه : و هو ده العشم يا كيرو ..
(بعد خمس دقائق اخري )
كيرلس : بقولك ايه يا اسفنجه , هي ايه الصوبيا ديه ؟؟
اسفنجه : مش عارف والله ,
كيرلس : مممم طب بقولك , ممكن ادوق الصوبيا ؟؟ اصلي عمري ما دقتها ..
اسفنجه : اوي .. اوي
( كيرلس يشرب كوبايه كامله !! )
كيرلس (يتكرع) : ده طعمها جامد فشح !! و خصوصا طعمه في البوء .. ! ازاي تحفه كده !!
اسفنجه : بالهنا و الشفا يا كيرلس ..
كيرلس : طب بقولك ايه , انت مش معاك اكل , صح ؟؟ .. اصلي حاسس اني شامم ريحه كمام و كفته ؟؟
اسفنجه (بدأ يتعصب ) : لا ! معيش يا كيرلس
كيرلس : خلاص يا صاحبي , نفطر مع بعض بقي
( يبتسم اسفنجه بدون كلام !! )
(بعد خمس دقائق اخرين )
كيرلس : هي المايه العاديه , يعني لا عصير و لا حاجه , تكسر الصايم , صح ؟؟
اسفنجه : اه !!
كيرلس : خلاص بقي .. اصلي الصراحه كنت عطشان فشخ , بس مش عاوز اشرب قدامك عشان متزعلش و كده , غير محسش اني بوقفتي ديه عبء عليك ..
اسفنجه : لا خالص .. اشرب يا عم و لو عاوز تمشي , امشي , عادي يعني
كيرلس : لا طبعا مش حمشي .. انا معاك .. لغايه الفطار ..
يخرج كيرلس ازازه مايه مشبره بها قطعه تلج و يشرب منها ..
ينظر له اسفنجه ..
كيرلس ( مبررا ) : اصل التمر و الصوبيا , السكر اللي فيهم خلاني اعطش , بس اشطه مش حشرب تاني , نشرب بقي مع بعض علي الفطار
(بعد خمس دقائق اخرين )
كيرلس : اسفنجه .. ممكن سؤال
اسفنجه : نعم !!
كيرلس : هو اللبان يكسر الصايم ؟؟؟
اسفنجه (بنرفزه ) : اه !! اي حاجه تدخل في بوءك تكسر الصيام ؟؟!! اهدا بقي !!
كيرلس : اصلي بقول اطلع لبان اكله كده , بدل ما انا واقف مش بعمل حاجه
اسفنجه : يا عم اتنيل , اعمل اللي عاوز تعمله و اخلص بقي
كيرلس : في ايه يا اسفنجه !!؟؟ انت متعصب ليه ؟؟ بقي هي ديه كلمه شكرا يا جدع
اسفنجه : يا عم شكرا , روح بيتكوا و سيبني بقي
كيرلس (حزين ) : يا خساره يا اسفنجه , و انا اللي كنت بقول عليك صاحبي .. متشكر يا عم ...
( يغادر كيرلس و لكنه يرجع لاسفنجه بعد خمس دقايق )
اسفنجه : ايه ؟! عاوز ايه تاني ؟؟
كيرلس : انا قلت انت صاحبي برضه , و حتي و لو انت زعلان و لا حاجه , لازم استحملك .. عشان هو ده الصاحب اللي بجد ..
اسفنجه (يخجل من نفسه ) : طب انا اسف يا سيدي !!
كيرلس (مبتسما ) : خلاص سامحتك ههههه
اسفنجه (بعتاب ) : معلش يا كيرو , فعلا يمكن عشان الصيام الواحد مخنوق
كيرلس : و عشان كده الاصحاب موجوده يا اسفنجه , عشان تشيل بعض
اسفنجه : حبيبي يا كيرو
(بعد ثواني )
كيرلس : اسفنجه , ممكن ادوق قمر الدين ؟؟
اسفنجه (بغضب ) : يلا يا ### من هنا !! تصدق يلا انا حطالب بالخلافه عشان نرجع ناخد منكوا الجزيه تاني !! يلا يا ابن ### !!
كيرلس (من بعيد بكل برود ) : يعني مش حنفطر مع بعض ؟؟ فين الوحده الوطنيه يا اسفنجه ؟؟ يا خساره يا اسفنجه !!
اسفنجه (بغضب عارم ) : ده انت ### صحيح !! هو انت لسه عاوز تفطر يلا ؟!! ده انت بقي لك ساعه عمال تفطر !! عارف يلا لو شفتك في الشارع ده تاني .. حفشخك .. و اقولك كمان !! ## ام الوحده الوطنيه علي ام اللي عاوزها ... و اقولك كمان برضه مصر اسلاميه , مصر اسلاميه يا ولاد ## !!
No comments:
Post a Comment