ال "مش إجتماعي"

نرمين من نوع البنات اللي مش بتحب الخروجات ,الحفلات ,, الجو ده , عدد أصحابها قليل أوي و مش بتصاحب حد جديد بسهوله .. بتحب الهدوء و الكلام القليل .. متعتها في القرايه , الموسيقي , الرسم , اي نشاط تعمله لوحدها ببساطه .. اللي يعرفوها بيقولها عليها هاديه زياده علي اللزوم أو بنت غلبانه في حالها ,, اللي معرفوهاش بيقولوا عليها مُعقده أو عندها حاله نفسيه ! .. 

كتير أوي , بنشوف شخصيات في حياتنا زي نرمين , شخصيات بنتهمها أنهم مغرورين مش بيحبوا يتعاملوا مع الناس ببساطه أو أنهم جبناء و بيخافوا يحتكوا بالناس .. و علطول بنحطهم في خانه الشخص الـ" مش إجتماعي " , و عشان نفهم الشخصيات ديه لازم نفصل في الأول بين مفهومين مهمين , الـ introversion الأنطوائيه و الـ Shyness الخجل , 

1- الـ introverted ( الإنطوائي ) : ده شخص مش إجتماعي , بس السبب مش أنه مش عارف يبقي أجتماعي , لا السبب أنه هو غير مهتم بالمجتمع اللي هو فيه .. بمعني , أن نرمين لو أنطوائيه , فهي مش مهتمه بمعرفه الناس الجديده او حتي الحفاظ علي أصدقاءها القدام ,.. و مع انها تقدر تكون إجتماعيه و إمكانياتها تساعدها , بس الرغبه نفسها مش موجودة .. 

2- الـ Shy ( الخجول ) : ده شخص مش إجتماعي , بس السبب هنا , هو أنه مش عارف يبقي أجتماعي , مع ان هو عاوز يتعرف و يتعامل مع ناس جديده , بس إمكانياته مش بتساعده .. , بمعني ان نرمين لو خجوله , فهي مهتمه جدا و نفسها أوي تعمل كل الحاجات الإجتماعيه ديه ... بس مش عارفه تكون إجتماعيه .. فبالرغم من الرغبة موجودة , حاجز الكسوف و الخجل دايما بيمنعها ..

الأنطوائي و الخجول , دول أنواع شخصيه , مش أضطرابات او أمراض .. الخوف بقي من الـ social phobia (الرهاب الإجتماعي ) .... لو نرمين عندها الرهاب الإجتماعي , فهي مش مجرد غير مهتمه او خجلانه , لا ديه مريضه ! ,, فالرهاب الإجتماعي .. الأنسان مش مجرد مش إجتماعي , لا ده حتي التفكير في اي حاجه إجتماعيه بتبقي جحيم ! , بمعني ان لو نرمين عندها رهاب إجتماعي ,, و حد من أهلها ضغط عليها و أجبرها أنها تروح حفلة حد من قرايبها غصب عنها .. ممكن تفضل تعرق و وشها يحمر , ضربات قلبها تدق جامد و أيدها ترتعش .. ممكن توصل انها يغمي عليها او تحس بصعوبه في التنفس !! فمش اي حد يكون في فرح و ميرضاش يرقص , او يكون في حفله و ميرضاش يتعرف علي ناس جديده , نقول عنده social phobia , عشان غالبا اللي عنده social phobia مش حيجي الحاجات ديه من الأساس !

في مصطلح تاني و هو الـ Anti-social behaviours , و ده اللي بيعاني منه مش مجرد مش إجتماعي , لا ده أنسان ضد المجتمع ! و كاره لكل مظاهره اللي حواليه .. شخص بيخرب في كراسي الأتوبيس , يبكسر في سور المدارس , بيخرب في عواميد النور ! .. هو مش بس مش عاوز يتعامل مع المجتمع , لا ده بيتعمد يأذي و يضر اللي حواليه !

في النهايه , لما تشوف او تتعامل مع شخصيه مش إجتماعيه زي نرمين متتسرعش انك ترميها بتُهم و عيوب .. مش معني أن الشخص بالنسبه لك مش إجتماعي يبقي مغرور او بيتكبر عشان ممكن يكون فعلا مش عارف يتواصل مع اللي حواليه .. او أنه مريض و مُعقد عشان ممكن يكون فعلا مش متهم او مش ديه طريقه أنبساطه ... و متنساش الـ "مش إجتماعي " مش نوع واحد .. لا ديه كلمه كبيره لتصنفات كتير ..