# امام احد الاكشاك ,
كيرلس : يعني انت شايف اني اتصل بيهم يا غيبوبه ؟؟ اصل انا الصراحه خايف ..
غيبوبه : خايف من ايه يا ابني ؟! ده انت المفروض تكون فخور باللي حتعمله , ده مش بعيد يدوك فلوس مقابل المعلومات ديه
كيرلس : انا ابويا قال لي كده برضه , طب بقولك ممكن اتصل بيهم من موبيلك عشان معيش رصيد
غيبوبه : اوي , اوي بس لما تقفش الفلوس ابقي افتكرني معاك .. خد الموبيل اهو , بس كلمهم بعيد عن هنا عشان الدوشه , ادخل اي مكان هادي و كلمهم ..
# ياخد كيرلس موبيل صديقه غيبوبه لمكان هادئ و يتصل بيهم ...
كيرلس : الو .. ممكن لو سمحت اكلم مركز الامن الوطني
المسؤول : ايوه احنا مع حضرتك , مركز الامن الوطني , اتفضل
كيرلس : طب انتوا عاملين ايه ؟
المسؤول : " عاملين ايه " ايه يا استاذ ؟! احنا مركز الامن الوطني يا افندم , اتفضل قول شكوتك علطول ..
كيرلس : انا اسف بس اصل الصراحه ديه اول مره اتصل بيكوا , فمعلش بقي , لا هي حضرتك مش شكوه , بس انا عندي معلومات ممكن تفيدكوا
المسؤول : طب اتفضل اتكلم يا استاذ
كيرلس : يعني أقول مداخلتي علطول ؟!
المسؤول : مداخله ايه يا استاذ ؟! يا سيدي قول اللي عندك و خلاصنا !
كيرلس : حاضر يا باشا , بس معلش يعني حضرتك اكيد مقدر الرهبه اللي الواحد فيها و كده , فانا اسف يعني
المسؤول : ماشي يا سيدي , بس اتفضل اتكلم
كيرلس :هو انتوا كنتوا بتعرضوا صور في التلفزيون و بتقولوا اللي يعرف الناس ديه يتصل بينا ؟؟
المسؤول : ايوه , انت اتعرفت علي حد منهم ؟
كيرلس : اه في واحد اتعرفت عليه .. بس الصراحه انا خايف لا تكون ديه فتنه !
المسؤول : فتنه ايه يا استاذ !!!! ده واحد مجرم , لو انت عارف عنه اي حاجه لازم تقولها عشان تحمي بلدك من الارهاب !!
كيرلس : حضرتك فعلا عندك حق , انا اسف , بس اكيد حضرتك مقدر ان في رهبه في المكالمه , فمعلش ممكن تلاقيني مخضوض و كده ..
المسؤول : يا استاذي متخفش خالص و اتكلم عادي , قول المعلومات اللي عندك كلها ,,, الاول قول لي اسم المشتبه اللي اتعرفت علي صورته ؟
كيرلس : هو الصراحه انا ملحتقش اشوف اسمه , انا كنت لسه خارج من الحمام ساعتها , و ابويا كان مشغل التلفزيون في الصالون , فيادوب و انا معدي شفت الصوره فزعقت و قلت " انا عارف الراجل ده .. انا عارف الراجل ده " فابويا قال لي اتصل بيكوا بسرعه , فاتصلت عشان امدكوا بكل المعلومات اللي اعرفها
المسؤول : طب اتفصل يا استادي قول كل المعلومات ؟!
كيرلس : انا حضرتك قبل كده كنت رايح رمسيس بالمترو , فلما جت محطه الشهدا , باب المترو اتفتح , و انا كنت نازل , لكن كان في واحد طالع قصادي , الواحد ده راح خبطتني بكتفه , بس هي الصراحه كانت خبطه خفيفه مش قصده يعني , المهم بصيت له فهو راح بص لي , و فضلنا بصين لبعض شويه , حتي انا قلقت .. بس بعد كده هو ركب المترو و انا مشيت و سبنا بعض ..
المسؤول : ايوه و بعدين ؟! فين بقي الملعومات في الفيلم الرومانسي اللي كنت بتحكيه من شويه !؟!
كيرلس : ما هو حضرتك الراجل ده , هو اللي انا شفت صورته تبع الارهابين ,
المسؤول : طب كانت في حاجه مميزه فيه او اي علامه غريبه ؟؟
كيرلس : اه , هو كان جايب شعره علي جنب , و مبلول شويه .. هو حضرتك كان شبه سمسم في فيلم كده رضا ,
المسؤول : مبلول شويه و سمسم , الصبر من عندك يا رب !!! طب و الكلام ده كان من امتي يا ابني ؟!
كيرلس : ده كان من حوالي 3 سنين كده , تقدر تقول بعد ثوره 25 يناير علطول ..
المسؤول : 3 سنين و شبه سمسم و ابوك كان قاعد في الصالون و انت كنت خارج من الحمام !!! طب عارف يا ابن الـ#$% لو شفتك حـ$%^ , يا $%^ , انت فاكر اني مش حعرف اجيبك !! نمره موبايلك ظاهره قدامي يا $%^ .. ده انا حجيبك لغايه عندي يا $%# ....
# يغلق كيرلس الموبيل سريعا مصدوما برد فعل الشرطي , و يعود لصديقه غيبوبه ليعيطه موبيله
غيبوبه : مالك يلا , وشك اصفر كده ليه ؟! هو ايه اللي حصل ؟؟
كيرلس : المكالمه كانت ماشيه زي الفل و فجأه من غير اي حاجه, لاقت الراجل بيشتمني مع اني كنت بقوله المعلومات كلها , فاتخضيت و قفلت السكه في وشه ..!
غيبوبه : اه يا داخليه بلطجيه !! حيفضلوا طول عمرهم كده لسانهم ابيح !! , يعني مش كفايه انك بتدي له معلومات لا لازم يشتم و يسب , بس انت خلاص عملت اللي عليك , هو بقي خد الملعومات اللي عندك و حيشتغل عليها و مش بعيد تلاقيهم بعتين لك فلوس و لا حاجه مقابل المعلومات ديه , ابقي افتركني بقي يا ابن المحظوظه .. علي العموم انا حمشي دلؤتي و ابقي اشوفك بليل ...
كيرلس رجع بيته يفكر في سلوك الداخليه الذي لم يتغير و كأن ثوره لم تقم و لا نظام قد سقط , يتسأل حتي متي ستظل الشرطه تعامل المواطن بهذا الكم من التحقير و الاهانه ! , و اما عن صديقه غيبوبه فقد اختفي في ظروف غامضه , و مازال مفقودا حتي الان و لم يعثر عليه احد ... !
No comments:
Post a Comment