البوستر ده اسمه Anger Transference
للرسام الامريكي Richard Sargent , و اللي تحديدا رسمه يوم 20 مارس 1954 (يعني زي انهارده )
البوستر مكون من 4 panels ,
اول panel : مدير بيزعق لموظف في الشغل
تاني panel : الموظف ده بيروح بيته و يزعق لمراته
تالت panel : زوجه الموظف بتزعق لابنها
رابع panel : الابن بيزعق للقطه ...
من ألات الدفاع النفسي حاجه اسمها الـ displacement (التفريغ ) .. و هي ان الانسان لما بيمر بضغط كبير او بقهر فوق طاقته , بيدور علي اي حاجه عشان يفرغ فيها غضبه ده .. و الهدف من التفريغ بيكون لاسترداد وهمي للسيطره .. بمعني المدير يزعق للموظف , فالموظف يرجع بيته يشتم و يهين و يعتدي علي مراته ! اللي ملهاش اي ذنب او اي علاقه بمديره , بس مجرد بيثبت لنفسه انه لسه قادر علي غضب و الثوره , لسه متسلبش منه حقه في الجعجعه و الصوت العالي !! .. حاجه تانيه في الـ displacement , هي ان الانسان المقهور يحس انه شعور القهر اللي مر بيه اتنقل لاشخاص تانيه حتي و لو من الاشخاص ديه ملهاش اي علاقه بالحدث نفسه , انما مش لوحده اللي اتقهر في ناس تانيه معاه ! ..... من اهم صفات الاشخاص اللي بيتم تفريغ طاقه الغضب فيهم , انهم بيكونوا اصغر او اضعف من الشخص المقهور , عشان يضمن ان محدش حيقدر يرد التفريغ ده تاني او حتي يعترض ,,, كل ده بيجبر المجتمع لخلق كائنات اضعف عشان تقوم بدورها في تحمل الغضب و امتصاص القهر .. كل ده بيخلق طبقه "الكائنات الاضعف " !
الاعداد لطبقه الكائنات الأضعف ,, بيبتدي من و هي صغيره , بيتم تربيتها انها لازم تتحمل الضغط ده و الاقناع بيكون بمبررات مجتمعيه او دينيه !! , و لما تكبر شويه بيتم ترهيبها من اي محاوله لرفض التفريغ ده , لان العواقب حتكون دايما مش في صالحها !! , و اخر خطوه هي حشو امخاخها بأن واجب من واجبتها تجاه المجتمع هو السكوت و الرضوخ للقهر , عشان الدنيا تمشي و الحياه تستقر .. !!! مع الوقت طبقه "الكائنات الأضعف " , بتتأقلم مع الوضع و بتتعايش معاه كأنه امر طبيعي جدا مفهوش اي انتقاص من حقوقها او كرامتها , بالعكس ده ساعات بتهاجم اي حد يحاول يساعدها او يدافع عنها ! ,,, و المدهش في موضوع انها بدل ما تفكر ترفع الضغط او القهر ده عن نفسها , لا , انما بتحاول تدور علي كائنات اضعف منها عشان تمارس هي كمان حقها في القهر و التفريغ ,, و لو ملقتهومش تخلقهم ! ... و يبتدي يتشكل عندنا مجتمع كامل من الكائنات الضعيفه الهشه اللي محبوسه في سجن الساديه و غرقانه في محيط القيم فاسده .. !!
في ظل الفشل الاجتماعي و التشوهات النفسيه اللي احنا عايشين فيها , اكاد اجزم ان مفيش حد فينا قدر ينجو من طبقه الكائنات الأضعف , كلنا مرنا بيها و لو في مرحله ما من حياتنا ! , ده بالعكس حتي مفاهيم القوه عندنا تم تشويها و تحريفها ... كلنا بلا اسثناء تم تفريغ فينا كميات مش قليله من غضب و قهر و ظلم , و لسه حيتم تفريغ فينا اكتر و اكتر , ... بس اتمني ان لو حيكون في كائنات أضعف تاني في المجتمع ده , نكون احنا اخر طبقه .. خلينا نكون اخر محطه في سلسله القهر .. بلاش نساهم في تدمير و تخريب عقول و نفوس اجيال تانيه ملهاش اي ذنب .. و اهو لو احنا مش قادرين نوصل للسطح ,, بلاش نشد ناس تانيه للقاع ..... !
لو عاوز تشوف اعمال تانيه للفنان Richard-Sargent :
No comments:
Post a Comment