الجمال

الصوره لـFlorence Colgate و اللي حصلت علي لقب اجمل وش في العالم في سنه 2012 .. و ده عشان حصولها علي نتايج مبهره جدا في الـ Golden Ratio of Beauty , و ديه عباره عن مُعادله حطوها العلماء و الفنانين عشان يحددوا مدي جمال الوش .. و اللي منها مثلا العلاقه بين عرض الراس و المسافه اللي بين العينين , او العلاقه بين طول الراس و المسافه اللي بين عين و البوء .. و مقاسات كتير لو حد مهتم ممكن يعرفها من هنا : http://goo.gl/mvsyLT و http://goo.gl/uCsjSd وhttp://goo.gl/JQsxtg 

سنه 1972 , العلماء Karen Dion و Ellen Berscheid و Elaine Walsterعملوا تجربه عشان يشوفوا تأثير الجمال علي تعاملات الناس و أراءهم في بعض .. و التجربه كانت انهم جابوا عدد من المتطوعين و وزعوا علي كل واحد فيهم 3 صور , صوره لبنت اموره جدا و صوره لبنت يعني مش اموره اوي , و صوره لبنت مش اموره خالص ! و طلبوا منهم يحكموا علي البنات من حيث شخصياتهم و مدي سعادتهم في حياتهم , و النتيجه كانت ان الناس شبه اتفقت ان الجمال مرتبط بالشخصيه الجميله و السعاده في الحياه , و ان البنت اللي مش جميله عندها مشاكل نفسيه و مش مبسوطه في حياتها !! النتيجه ديه اذهلت العلماء و اللي استغربوا انه تم الحكم علي اصحاب الصوره من مجرد صوره !! و ده اللي اتسمي الـ Halo effect .. الـ Halo effect , هو ببساطه انه بيكون في دماغك زي ثوابت معينه عن حاجات في الحياه , بتبتدي بتطبق الثوابت ديه علي المجتمع من غير ما تركز ! , زي مثلا الانسان القصير بيكون خبيث , الانسان التخين بيكون طيب , و برضه البنت الجميله بتكون سعيده دايما في حياتها ... ! بس هو فعلا البنت الجميله بتكون سعيده في حياتها ؟؟؟؟؟؟!! 

سنه 2013 , الدكتوره Zhana Vrangalova , عملت زي بحث عشان تشوف مدي اجتماعيه البنات الجميله او البنات متعدده العلاقات ,, و اللي اتصدمت لما اكتشفت ان البنت كل ما كانت جميله او ليها علاقات كتير , كل ما كانت مكروهه او مرفوضه من البنات التانيه ! و كلام ده موجود بالتفصيل و معاه دراسات تانيه في مقاله بعنوان ( Women Who Hate Other Women: The Psychological Root of Snarky http://goo.gl/EqcRsN )

الانسان بطبعه بيسعي دايما انه يكون الأفضل او الأكثر شعبيه بين الناس , و عشان كده لما بيقابل حد ممكن ينافسه في حاجه زي كده , يبتدي تلقئيا انه يرفضه او حتي يهاجم فيه , عشان ساعتها بيكون الحد ده عدوه اللي لازم يتخلص منه عشان يحافظ علي مركزه و وضعه !! , نفس الفكره بتحصل مع البنت الجميله (او الولد الجميل بس الموضوع ده في البنات اكتر ) .. البنت الجميله وسط زميلاتها بتكون عامله زي العقبه اللي لازم تختفي , بيتكون بمثابه تهديد غير مباشر علي وجودهم .. حتي و لو ظهروا بمظهر الصديقات او الزميلات , بس لسه في صراع نفسي جبار بيحصل جواهم , و خصوصا ان الغيره بتكون نابعه من ان البنت الجميله متعبتش في اي حاجه عشان تكون جميله ,, ده مجرد حظها , اشمعنا هي و هما لأ ؟!! فتبتدي تتهاجم في تفكيرها و اخلاقها , تبتدي يطلع عليها اشاعات لتشويها , تبتدي تتعامل كأنها تافهه او شمال لمجرد بس انها جميله !!! و اي حد يبقي معجب بيها او منجذب تجاها , يبقي لمجرد شكلها و مظهرها ! و فعلا للاسف نسبه مش قليله من الولاد بيبتدوا يجردوا البنت الجميله من شخصيتها و عقلها .. او يهمشوا اراءها و مواقفها ,, فيتعاملوا مع جمالها السطحي بس ,,, جميلات كتير بتستلم للوضع و تتعامل علي هذا الاساس , و يبقي فعلا جمالها هو امكانيتها الوحيده لمواجه الحياه و واحده واحده تتأقلم مع الوضع و تتعلم تستغله احسن استغال !! ,, و جميلات تانيه بترفض المنظور ده و بتحاول تثبت للمجتمع انها أهم و اعظم من مجرد وش جميل !! .. كل ده زي ما بيخلي من جمال البنت ميزه , برضه بيخليه عبء و لعنه مش بتحسها الا هي نفسها .. !!

طب و البنت اللي مش جميله ؟؟! خلينا نكون واقعين ,, في حوالي اكتر من 3 بليون انثي علي الكره الارضيه .. اكيد مش كلهم شبه Florence Colgate او حتي ليهم نتايج كويسه في الـ Golden Ratio of Beauty ,,, اكيد مش كلهم يصلحوا انهم يكونوا عارضات ازياء او حتي ممثلات في هوليود , اكيد كلهم مش حلوين شكلا او جذابين علي مستوي المظهري !! .. بس ديه مش معناه انها تفضل تضغط علي نفسها عشان تبقي شكل معين او تقسو علي حالها و ذاتها عشان تعجب الناس ,, .. اه ممكن تكون مش جميله , بس ممكن تكون مثقفه , تكون شجاعه , تكون طيبه , تكون جدعه !... ممكن تكون حاجات كتير تانيه متقلش اهميه عن الجمال الخارجي , ده بالعكس , حاجات مش مجرد بتشد العين او تحرك النزوه , انما تأسر القلب و تخطف العقل و تسحر الروح .. حاجات تعتبر أسمي أنواع الجمال !!

" .. فأن أسمى أنواع الجمال ليس ذلك الذي يفتِنُنا على الفور، بل الذي يتسلّل إلينا ببطء ,, فنحملهُ معنا ونحن لا نكاد نشعر به ... " 

فريدريك نيتشه