" .. وكان قد اصابه الملل , كما يصيب معظم الناس . فقد عزل نفسه عن واقع مليئ بالتعقيدات والدراما و انسلخ بعيدا عن الحياه ... و لكنه من داخله كان مؤمنا ان شيء يجب أن يحدث !! عاجلا ام اجلا , شيء ما يجب ان يحدث .. "
ألبير كامو ، رواية السقطة (The Fall)
معتقدش ان في حد علي سطح الارض مامرش بهذا الشعور البغيض , الشعور المؤلم , الشعور البيض ! اللي اسمه الملل .. و فجأه و بدون اي مقدمات الواحد يحس ان مفيش حاجه عجباه , حاجه شغلاه , حاجه شداه اصلا للاستمرار في المدعكه اللي اسمها الحياه ... نوع غريب من اللامبالاه .. و كأن الانسان تحول مره واحده لمجرد كتله ماديه بتملي حيز في الفراغ الكوني اللي هو عايش فيه لا اكتر و لا اقل ...
لو حبينا نروح للعلم و نشوف ايه اللي بيخلي الانسان يحس بالشعور الرخم ده ؟؟ حنلاقي الاجابه في الهرمونات ... حاجه مؤسفه الصراحه ان واحد شحط طول بعرض تأثر فيه بروتنات حقيره اسمها هرمونات .. و الهرمون الساذج اللي بيسبب موضوع الملل ده هو "الدوبامين " dopamine .. لما بسلامته يقل بيصاب الانسان بالملل و يحس انه مفتقد الحماسه في اي نشاط بيعمله , طبعا الموضوع مش بالبساطه ديه , بس ديه الفكره العامه .. في ناس بقي حظها اسود , ان اساسا بتكون مولوده بنسبه دوبامين قليله اصلا في جسمها او ال receptors) ) المجسات اللي بتحس الدوبامين في جسمها كتير , فتدي مؤشر انه قليل دايما .. و دول عشان منحوسين بيعانوا من ملل مزمن .. و ما اكتر اصدقاءنا المنحوسين دول ...
علماء النفس فسروا حاله الملل عند البشر انه شعور مؤقت غير محبوب بيدفعه انه ميركزش في اللي بيعمله دلؤتي او بيمر بيه .. و عملوا للملل مقياس عشان الواحد يشوف اذا كان معرض اكتر من غيره للوقوع في الملل ده و لا لأ و المقياس ده اسمه Boredom Proneness Scale , اللي عاوز يشوف نفسه :
علي قد ما محولات علماء النفس و الاطباء النفسيين و بتوع المخ و الاعصاب عشان يفسروا اسباب الملل و يحاولوا يوصلوا لتفاصيله الدقيقه , محولات كتير و قويه , الا انها لسه فاشله عشان توصل للنتايج النهائيه عن الموضوع ده ... علي الناحيه التانيه بتوع الفلاسفه و الفكر و اللي علي مر التاريخ بيتعمقوا في النفس البشريه لمحاوله فهم مشاعر الانسان و دوافعه في الحياه .. الملل كان بالنسبه لهم له جانب كبير من الاهتمام , و ده طبعا شيئ طبيعي جدا و منطقي كمان ... لان اغلبهم اصلا اتولد من مللهم للسائد , مللهم من المجتمع , مللهم من الحياه ... و كان الملل عنصر اساسي لتغير مجري حياتهم و تفكيرهم .. و زي ما ناس كتير اوي بتكره الملل و بتشوف انه سارق للوقت , و للمجهود و للفرحه و للحماس .. في ناس قليله بتشوف انه فرصه ! الملل عامل بالظبط زي المنبه , علي قد ما هو رزل و سخيف و بيصحيك من احلي نومه تحت البطنيه الصبح , علي قد ما هو لو سابك نايم حتفضل علي السرير و تفوتك حاجات كتير و انت نايم ... الملل هو الاشاره الحمرا اللي بتقولك انت في وضع زي الزفت , اتفضل شوف لك صرفه و غير الوضع ده ... الوضع اللي انتا فيه كئيب و غير ممتع ... و وضع من الاخر ميستحقش انتباهك ! و يقوم الملل معطل انتباهك في اللحظات الممله ديه عشان بيوفرهولك في مناسبات افضل (يعطله في قاعده عائليه رخمه مع طنط اللي عاوزك تجوز بنت اخوتها .. عشان يوفرهولك في الخروجه بتاعه بليل صايع الملل ) , ... حتي علي مستوي حياتك العامه , الملل بيقولك انت في علاقه بيض متكملهاش , الملل بيقولك انت في شغلانه متتسحقش مجهودك سيبها , الملل بيقولك غير اصحابك , بقولك غير روتين يومك , بيقولك اعمل حاجه جديده بقي , كون انسان له هدف في الحياه ..!
المشكله بقي ان هو فعلا زي المنبه اللي بيصحي النايم , بس مش مسؤول عنه بعد ما يصحي .. الملل حيصحيك و يقولك اعمل حاجه جديده عشان انت تستحق تكون في وضع افضل .. فانت بقي بتشوف الوضع الافضل ده حيكون ازاي ؟؟ ... زي ما ممكن تكسر الملل بقرايه روايه و تنبسط جدا , ممكن تكسر الملل بمشاهده فيلم سكس و برضه تنبسط .. زي ما ممكن تكسر الملل بلعب الرياضه تفيدك قدام , ممكن تنزل لعبه subway surfers و تجيب score اعلي من الواد بطيخه اللي معاك في الكليه و تستفيد لما تشوف لحظه الخساره في عين بطيخه .. زي ما ممكن تكسر الملل بالادب و الفن و العلم , ممكن تروح تقعد علي غرزه او تنزل توقف عند الكشك اللي تحت بيتكوا تهري في اي كلام و خلاص ,,
الواحد لو ركز في موضوع الملل ده حيلاقي انه زي حاجات كتير الانسان بيستخدمها كشماعه عشان يعلق عليها فشله و خيبته .. مع انه في الحقيقه نعمه و ميزه الانسان بتفاهته مش بيعرف يستغلها لمصلحته , انما علي العكس بيتدفن جوا ضعفه و يتحسر علي عالم بيتحرك حواليه و هو قاعد بيندب حظه مع الملل ....
تولستوي كان له جمله رائعه بيوصف بيها الملل و بيقول : " الملل هو الرغبة بأن يكون لنا رغبات نعيش من اجلها... " .. و كل ما كترت رغبات الانسان في الحياه , كل ما بقي حياته ليها طعم عشان تتعاش !!
الفيديو ده حلو جدا و في معلومات مفيده عن الملل :
No comments:
Post a Comment