في احدي الوحدات الصحيه ...
ماجد : ايه يا ابني ؟! شدتني من ايدي و جبتني هنا ليه ؟؟
اشرف : هو انتا فعلا يا ماجد حتكتب لهم شهادة الوفاة ؟!
ماجد : اه .. مالك في ايه ؟؟
اشرف : مالي ؟!! ده جريمه يا ماجد !!
ماجد : طب وطي صوتك عشان اهلها كلهم برا و لو سمعوك مش حيحصل كويس !
اشرف : ما يسمعوا و لا يتنيلوا !! انتا بكده بتقتل البنت ديه مره تانيه يا ماجد ! هو ده اللي انتا اتعلمته في كليه طب ؟!
ماجد : لا يا اشرف , ده اللي اتعلمته في الحياه !! و يا سيدي انا اللي حكتب شهادة الوفاة مش انتا ! لما يبقي يطلب منك ابقي ارفض .. و ساعتها وريني حترفض ازاي !
اشرف : انتا عارف و متأكد ان البنت ممتش موته طبيعية , انما ماتت عشان نزيف حاد نتيجه عمليه ختان! يعني جريمه قتل لازم يتعاقب اللي اتسبب فيها ! و لو شهادة الوفاة مثبتش الحاله , كده يبقي انتا بتشارك في الجريمه ..
ماجد : و نبي بلاش وعظ علي الفاضي و حط نفسك مكاني قبل ما تتكلم ! ... عاوزني اعمل ايه ؟!! .. عاوزني اطلع اقول لاهلها معلش مش حكتب لكوا شهادة الوفاة عشان ديه جريمه ! و لا اطلع اقولهم روحوا سلموا نفسكوا في القسم عشان ده الصح ؟!! هو ده اللي انتا عاوزه ؟؟ و متخيل حيكون رد فعلهم ايه ؟؟ حيسمعوا كلامي مثلا !!؟ .. اقل واجب حيشتموني , ازاي اقول " طهور البنت جريمه " !! ديه عفه و شرف ! .. و غالبا ممكن حد منهم يمد ايده عليا او يهددوني بالقتل عشان اكتب لهم الشهادة ديه و ممكن في الاخر بعد كل الاهانه و الرعب ده , اعمل اللي هما عاوزينه بس بعد ما كرامتي تكون اتمرمطت شويه و عملت قلق ملوش اي لزمه ! و كل ده عشان ايه ؟؟ و لا عشان مين ؟!
اشرف : يا سيدي لو مش عشان حق البنت الغلبانه , يبقي عشان حتي ضميرك , عشان مبادءك ..
ماجد : يوووه ! كلام , كلام , كلام !
اشرف : المبادئ مش كلام !
ماجد : مبادئ , و حاخد ايه من المبادئ لما واحد جاهل امي ابن ستين كلب يهيني , حاخد ايه من المبادئ لما حالي يوقف و كرامتي تتبهدل , حاخد ايه من المبادئ لما يترفع عليا سلاح و لا مطوه تيجي في عيني !! يا اخي يلعن ام دي مبادئ اعرض نفسي للموت عشان خاطرها ! اصحي يا اشرف و شوف انتا فين ,, انت مش في باريس و لا سوسيرا , انتا في قريه فقيره جدا في اقصي مناطق الصعيد المصري ! .. و لعلمك حتي و لو انا رفضت , حيلاقوا ألف واحد غيري يعملها لهم و ببلاش كمان !
اشرف : يا خساره يا ماجد !
ماجد : يا خساره انتا يا اشرف , لو دي دماغك اللي بتفكر بيها ,,,, ... انا مش بقول اني ملاك يا اشرف او اني مش بعمل حاجه غلط , بس في حاجات غلط اكبر من كده بكتير و اللي بيعملوها قاعدين في اعلي مناصب في البلد و حياتهم زي الفل ... فمتوجعش دماغي و دماغك .. كُل عيش يا اشرف ..
اشرف : و ذنبها ايه المسكينه اللي انتا حتضيع لها حقها بخوفك و جبنك ؟؟ مش كفايه ان اهلها قتلواها بدم بارد , لا ده انتا بتكمل عليها !!
ماجد :.. ذنبها زي ذنبي , و زي ذنبك و زي كتير غيرنا حياتنا بتتدمر قدام عيونا و مش عارفين نعمل حاجه .....
اشرف : لا عارفين بس مش عاوزين يا ماجد ! لو سمحت يا ماجد متكتبش شهادة الوفاة ! انتا كده بتزود المشكله مش بتحلها ! بتساهم ان جريمه زي ختان الاناث ديه متنتهيش ..
ماجد : و لا عمرها حتنتهي ! .. بص يا اشرف ... هي دايره من الوساخه و القذاره مقفوله علي اللي فيها .. كل اللي في دايره عارفين بعض و عايشين مع بعض , ليهم قوانينهم و عادتهم , ليهم الصح بتاعهم و الغلط بتاعهم , ليهم نظامهم الخاص .. و الغريب ملوش مكان بينهم ,, و لو حب يغير لهم قوانينهم او نظاهم بيكون لازم يموت ! ... مستنقع من الفساد الاخلاقي و السلوكي كلنا غرقانين فيه .. بنرضع الغلط من احنا لسه مولودين و بنكبر ان مفيش علاج لكده ! .. بكره تعرف معني كلامي يا اشرف , انتا بس عشان لسه جاي جديد مش فاهم الدنيا ماشيه ازاي , لسه متحطش في الموقف و فكرت في النتايج بنفسك .. الكلام حلو اوي و انتا بعيد ... بكره تتعلم و تعرف ان مفيش اي داعي انك تحاول تبقي بطل في مجتمع وسخ زي ده ! عشان البطل هنا هو اول واحد بيموت و محدش بيفتكره ..
No comments:
Post a Comment