الDrama Queen

رانيا كانت رايحه انهارده مع صاحبتها شيرين يعملوا shopping , و اللي بتتصل بيها رانيا بس مش بترد , بالصدفه رانيا بتفتح الـ facebook account بتاعها , بتلاقي شيرين صاحبتها متصوره في خروجه مع شله بنات تانيه و مكنتش قايله لها !! رانيا علطول قامت تتصل بشيرين عشان تفهم منها ! شيرين لسه مش بترد مع ان باين انها online من موبيلها !! رانيا بتفسر الموضوع ده ان شيرين صاحبتها بتحلق لها , و بدل ما رانيا تحلق لشيرين زي ما هي حلقت لها , لا ديه رانيا بتقفل علي نفسها أوضتها و تقعد تعيط .. رانيا بتقفل تليفونها و مش راضيه تكلم حد .... رانيا دخلت في حاله أكتئاب مزمن لدرجة ان مامتها خايفه ليحصل لها حاجة !!! رانيا ببساطه Drama queen .. 

الـ Drama queen مصطلح غير علمي , مقصود بيه التفاعل الـ over مع المواقف اللي ممكن تبان انها بسيطه او متستهالش كل الـ over اللي حصل ده .. و تبقي المشكله مش ان الأنسان يكون حساس او بتأثر باللي حواليه , بس المشكله ان التأثير او الأحساس ده يبقي بمقدار أكبر بكتير من حجمه الحقيقي , يبقي بشكل درامي غير واقعي .. بس هو ليه في Drama queen ؟؟ 

الموضوع بيبتدي من و انتا صغير .. لما كنت عاوز الـ happy meal من ماكدونلز و بابك مرضاش يجيب لك عشان انتا مش بترضي تأكل الأكل الصحي اللي في البيت ,, هنا الـ self-esteem بتاعك بتأثر , يعني أيه أعوز حاجه او أتعلق بحاجه و متجليش ؟! .. و هنا يتدخل عقلك الخبيث و يقولك , طب ما تجرب تعيط كده , أنتا زمان لما كنت بتعيط كان بابك ده بيحضنك و بيحاول يعمل اي حاجه عشان يرضيك .. فتقرر ساعتها ان الدراما ممكن تكون attention seeking behavior ممتاز عشان تلاقي تعاطف و تجاوب .. الكارثه بقي لما الدراما ديه تنفع و تحقق هدفها ! و مامتك متقدرش تشوفك مقموس او زعلان , فتقرر تضغط علي بابك عشان يجيب لك اللي انتا عاوزه , او حتي لو مقدرتش تضغط علي بابك , تيجي في صفك و تطاوعك في درامتك ديه ! و بدل ما تفهمك ليه بابك عمل كده , لأ ديه تحضنك و تبوسك عشان توقف دراما !! هو اه الـ self-esteem حيرجع لك تاني زي الفُل , بس مع تكرار مواقف زي ديه ححتول لـ Drama queen .. و مش شرط مامتك , ممكن صُحابك او صحباتك , قرايبك , اللي معاكي في الشغل , اي حد يشجعك في الدراما من غير ما يحاول يفهمك وضعك الحقيقي او يكلمك بمنطقيه و واقعيه , يبقي بيضرك مش بيفيدك .. 

طب هو ليه فيه Drama Queen و مفيش drama king ,, نظريا هو زي ما في بنات over في برضه ولاد over اوي .. بس الفكره ان الولاد بالنسبه لهم حل الدراما مش حل مقبول في العادي ,, سنه 2014 الدكتور David Lewis عمل تجربه عشان يشوف مين بيتأثر أكتر الولاد و لا البنات ,, و كان المفاجأه ان الراجل بيتأثر أكتر من الست , بس مش بيعبر عن مشاعره ديه ! بمعني ان حوالي 67% من الرجاله اللي شاركوا في التجربه و زعموا انهم متأثروش بحاجه , لما اتسألوا عن مشاعرهم لوحدهم قالوا انهم فعلا اتأثرو .. الفكره ببساطه هي ان الراجل بيتربي علي ان العياط مش للرجاله , ان هو حيبقي مسؤول عن بيت و أسره لازم يبقي قوي و ان المشاعر و الحزن ديه سمات ضعف , و علي عكس البنت اللي بتعيط و المجتمع يتعاطف معاها , الولد لو عيط كل اللي حواليه يتريقوا عليه , كل ده بيخلي الـ Drama king مش عارف ياخد فرصته و بيحبس كل مواهبه الدراميه جواه خوفا من الأستهزاء و السخريه .. بس في النهايه , سواء ولد او بنت .. يؤسفني أقولكوا أننا عايشين علي هذا الكوكب التعيس مع ناس و يمكن أحنا من ضمن الناس ديه .. الدراما بالنسبه لهم أسلوب حياه ...