الجمعه 14 – 2 , مليونيه حاشده وسط اجواء من الاحتفالات و الرقص امام وزاره الدفاع بالعباسيه ...
عقيد : هو ايه الظيطه اللي البره ديه يا عسكري ؟؟؟
العسكري : دول شويه شباب يا باشا ماسكين صور المشير عب الفتاح السيسي و عاملين مليونيه و قالوا مش حيمشوا غير لما يقابلوا سياده المشير ..
العقيد : مش حيمشوا غير لما يقابلوا المشير ؟! , ايه التهريج ده !!؟!! مين المسؤول عن العيال ديه .. روح بسرعه هات لي اي حد منهم اكلمه ..
يخرج العسكري و يرجع و معه كيرلس و صديقه غيبوبه مرتدين تشرتات عليها صوره عب الفتاح السيسي و مكتوب عليها هابي فلانتين يا سيسي
العقيد : انتوا بقي المسؤولين عن الزيطه اللي برا ؟؟؟
كيرلس : بالظبط حضرتك , انا كيرلس بهجت منسق حركه "سنجلز في حب مصر " و ده صديقي غيبوبه مسؤول المكتب السياسي بتاع الحركه
العقيد : تمام , و عاوزين ايه بقي من سياده المشير ؟؟
كيرلس : حضرتك احنا نازلين انهارده نفوض سياده المشير عب الفتاح السيسي باسم سنجلز مصر عشان يشوفلنا حل في اللي احنا فيه , يعني يا يوفرلنا بنات تخرج معانا , يا يلغي الفلانتين ! عشان اللي بيحصل ده كتير حضرتك و مينفعش , و ميرضيش ربنا و لا يرضي الوطن حتي !!
العقيد : لا طلبات مهمه جدا !! ,, ايوه و ايه كمان ؟! الاستاذ غيبوبه معندوش طلبات هو كمان ؟
غيبوبه في صمت غريب ..
كيرلس : لا يا باشا , احنا كده زي الفل , بس لو طلب صغير تاني , بخصوص حوار توفير البنات ده , انا كان عندي مشروع عاوز اعرضه قدام مجلس الوزرا بس مسنحتش الفرصه ينفع اعرضه علي حضرتك ؟!
العقيد : اوي اوي !! اتفضل !! احنا بنحب نسمع رأي الشباب
كيرلس : ربنا يخليك يا باشا , احنا ليه منعملش بروتوكول مع دول اجنبيه بخصوص الموضوع ده , يعني انا عارف ان علاقتنا باسم الله مشاء الله مع روسيا زي الفل , ليه المشير عب الفتاح السيسي ميكلملناش الرئيس بوتين و يخلص لنا الحوار ده ؟؟؟
العقيد : بروتكولات تحت مسمي ايه بالظبط ؟! دعاره خارجيه و لا محن دولي ؟!
كيرلس : ليه يا باشا بتستهزء من قضيتنا ؟! لعلمك يا باشا احنا كتله تصويتيه جامده ! لو خسرتونا ممكن نروح نفوض حمدين !؟
العقيد : نعم يا روح امك ؟!
كيرلس : يعني نفوضه يحل لنا مشكلتنا , متفهنيمش غلط يا باشا ..
العقيد : لا افهمك غلط ازاي ؟! ده انا معجب بيكوا خالص ! انتوا شباب مصر و مستقبلها و راحتكوا هي هدفنا .. و متقلقوش احنا حنحلو لكوا مشلتكوا ديه خالص ..
العقيد يهمس في اذن العسكري
العقيد : بقولك , شويه الـ #$%% اللي بره تمشوهم لي في ظرف دقايق , و مش عاوز اشوف $%^ فيهم يفضل قاعد !
العسكري : طب و الاتنين دول يا باشا ؟
العقيد : دول خدوهم اعملوا لهم كشف عذريه , و بعد كده ابعتوهم مركز تدريب الهايكستب هما حيظبوهم هناك
العقيد يرجع مره اخري لكيرلس : خلاص يا رجاله , احنا اهو بعتنا حد ينده سياده المشير و هو لما عرف مشكلتكوا اصر بنفسه يقابلكوا ...
كيرلس : هو ده سياده المشير اللي احنا نعرفه , راجل طيب و حنين و فاهم مشاكل الشباب , عليا النعمه يا باشا , الراجل ده كل ما اشوفه بحس ان كل ايامنا حتبقي فلانتين و حب , بحس بالدفئ كده و هو بيتكلم
العقيد : و لسه كلها دقايق و حتحس بالدفئ اكتر !
كيرلس : انا واثق يا باشا ان لو حضرتك قلت له علي فكره البروتكول ديه حيفرح بيها اوي و مش بعيد يخدها في برنامجه الانتخابي كمان
العقيد : طبعا طبعا ! انا سعيد جدا بيك يا كيرلس و بافكارك .. و سعيد اكتر ان في شباب زيك كده عندهم افكار عبقريه لحل مشاكل مصر الاساسيه زي مشكله الفلانتين ديه ! .. يا عسكري ! خد استاذ كيرلس و صديقه الاستاذ غيبوبه دخلهم يقابلوا المشير !!
No comments:
Post a Comment