محتارا .. حزينا , يفكر ماذا سيفعل غدا .. فاليوم هو ليله الفلانتين .. و هو العبد الفقير لربه السنجل , لا يعرف كيف سيتحمل ان يقضي الفلانتين وحده وسط هذا الكم الهائل من الخطوبات و الارتباطات ,,,,, ولكن فجأه ! و بدون اي مقدمات يقرر انه لا يجب ان يمر هذا الفلانتين كاي فلانتين قد مر ! عليه ان يكون فلانتين مختلف , فلانتين حقيقي !! فسريعا يمسك هاتفه المحمول و يتصل باي ارقام عشؤاويه , عله يجد مراده ..
المكالمه الاولي .....
كيرلس : الو
صوت رجل عجوز : الو , مين ؟
كيرلس : لا انا اسف , النمره غلط
الصوت : نمره غلط ازاي يا ابني ؟! هو انت عرفت انت بتكلم مين اصلا ؟ يووووه انت شكلك محسن ابن الحاجه شيماء , فينك يا ولا و ازيك و ازاي امك ؟! بقي كده يا وسخ ,مش بتسأل علي عمو مدحت ..
(يغلق كيرلس الخط سريعا .. ليجرب حظه مع رقم اخر )
المكالمه الثانيه ...........
كيرلس : الو
الصوت سيده : الو
كيرلس : مين معايا ؟؟
الصوت (يتغير لصوت رجل يتكلم بانفعال !) : انت اللي مين , و عاوز مين ؟
كيرلس : انا كيرلس و عاوز صاحب او صاحبه التليفون ...
الصوت : صاحبه التليفون ؟! هو انت يا $#% , صاحبه التليفون تبقي مرات الاريل اللي بيكلمك !!
( ثم فجأه يسمع كيرلس صوت ضرب و صراخ ) : اه يا فاجره , اسمه كيرلس !! مش كفايه بتخونيني , لا ده انتي بتخونيني مع نصراني و اسمه كيرلس !!, طب اختاري عماد او شكري اهو مش باين !! انا حورايكي يا #$% ..
(يغلق كيرلس الخط .. و يجرب حظه مره اخري )
المكالمه الثالثه ……
كيرلس : الو
صوت نسائي : الو .. مين ؟
كيرلس : انا كيرلس
الصوت : و انا سوسن , قول لي تحب اجي عندك و لا انتا تيجي عندي ؟
كيرلس (بفرحه ) : انا مش مصدق نفسي !! علطول كده !! احمدك يا رب , لا احسن خليها في اي كافيه , حتي عشان يكون مكان فيه ناس في اول تعارف
الصوت : في اي كافيه ايه يا اخ انت ؟! , و مكان فيه ناس !! ازاي يعني !!!؟ علي العموم نتقابل و نشوف حنروح فين ؟! , بس بقولك ايه بسرعه و النبي قبل ما جوزي يرجع , عشان كمان سايبه الواد عند اختي سماح و هي برضه عاوز تلحق قبل ما جوزها يرجع
كيرلس : جوز ايه ؟ و سماح مين ؟ هو مش انتي برضه بتدوري علي حد يخرج معاكي في الفلانتين !
الصوت : فلانتين مين يا عم انت ؟؟ هو انت مش من طرف المعلمه صباح ؟؟
كيرلس : لا انا كيرلس و ...
( فجأه ينغلق الخط علي كيرلس !! , فقرر ان يجرب حظه مره اخري )
المكالمه الرابعه .....
كيرلس : الو
الصوت : ايوه كده تمام يا عباس .. بس متنساش بعد ما تخلص المكالمه تكسر الشريحه علطول عشان معروفش يتعقبوا المكالمه , المهم هدف التفجير انهارده محطه مصر , فقول للاخوه ..
كيرلس (مقاطعه ) : عباس مين حضرتك ؟! و تفجير ايه ؟؟
الصوت (بعصبيه) : انتوا قبضتوا علي عباس يا كفره؟!! فاكرين ان كده , حتكسرونا !؟! ده بالعكس احنا بنقوي و بنصمد ! و حنفرجكوا واحد واحد و لو طالت نفجر عباس نفسه في سبيل القضيه حنفجره ! , النصر او الشهاده يا كفره .. النصر او الشهاده !!
( ينغلق الخط علي كيرلس للمره الرابعه !! فييأس و يتمكله الاحباط .. يترك هاتفه و يدرك انه لا يوجد امل ! فمكتوب له قضاء الفلانتين وحيدا ... لكن فجأه هاتفه يرن , انه رقم غريب ... )
كيرلس : الو , مين معايا ؟
صوت نسائي ناعم : انا نرمين يا ابني .. برضه مسجلتش النمره ؟!
كيرلس : انا اسف .. ازيك يا نرمين ؟
نرمين : ازيك انت ؟ فاضي نخرج مع بعض بكره ؟
كيرلس : اه طبعا فاضي
نرمين : خلاص , حتخرجني فين ؟؟
كيرلس : اي مكان ... تروحي السيرك الاوروبي بتاع نادي الشمس
نرمين : سيرك ايه ؟!! لا فكك , بقولك , فاكر المطعم الصيني اللي روحناه مع بعض ؟
كيرلس : لا
نرمين : خلاص نتقابل هناك ..
كيرلس : تمام ,طب هما عندهم العصيان الخسب اللي بياكلوا بيها ولا اجيب و انا جاي
نرمين : ههه انت غريب اوي يا عادل انهارده ! عصيان ايه يا ابني اللي حتجبها معاك
كيرلس : هو انا اسمي كيرلس مش عادل , بس لو انتي عاوزه تناديني عادل معندش اي مشكله
نرمين : ايه ده !! سوري جدا , انا اسفه , طلبت نمرتك علي اساس انها نمره عادل صاحبي , معلش بجد , سلام
كيرلس : لا ثانيه !! لو سمحتي متقفليش الخط !! انا ما صدقت حد عبرني ؟! ارجوكي ..
نرمين : للاسف مضطره اقفل
كيرلس : طب استني !! ممكن لو سمحت ابقي اجي اقعد معاكوا انتي و عادل ! و صدقني مش حفتح بوءي , مجرد حقعد جنبكوا ساكت
نرمين : ده انت حالتك صعبه اوي ! بس حقيقي مينفعش , .. طب اسمع , شوف مين السنه اللي فاتت بعت لك رساله في الفلانتين , و السنه ديه انت اتصل بيه و علطول اخرجوا مع بعض ..
كيرلس : اشرف الميكانيكي بعت لي رساله في الفلانتين اللي فات ..
نرمين : طب ابقي اتصل باشرف الميكانيكي و خليه يخرج معاك ! سلام
كيرلس : لا ارجوكي استني !! حقيقي انا مش بهزر , فعلا مفيش ولا بنت اتصلت بيا او حتي بعتت لي رساله في اليوم ده , ده حتي رساله اشرف كان بيقولي فيها ان موتور العرابيه اتحرق !! ... , طب معلش ممكن طلب صغير و تبقي عملتي ثواب في شاب سنجل ربنا يقعدهو لك في عادل , ممكن تقابلني قبل ما تقابلي عادل و لو حتي لربع ساعه ؟!
نرمين : انت صعبان عليا اوي علي فكره , و حاسه انك شاب غلبان جدا , طب بص يا سيدي , خلاص انا حقابلك و حتي حعرفك علي عادل , و انت حتحبه علي فكره و مش بعيد تبقوا اصحاب كمان ,
كيرلس (بفرحه شديده) : ربنا يخليكي و يخلي لك عادل , انا مش عارف اوصف لك ازاي سعادتي !!
نرمين : خلاص بص يا عمنا , احنا حنتقابل بكره الساعه 4 عنده محطه الرمل , اشطه ؟!
كيرلس : محطه الرمل !!! انتوا مش من القاهره ؟! يعني حتي يوم ما الاقي حد يعبرني يكون المسافه بيني و بينه 220 كيلو !! علي العموم بلغي تحياتي لعادل و انبسطوا انتوا بالفلانتين و انا حبقي اتصل اشوف اشرف الميكانيكي فاضي يخرج معايا و لا لأ ,, الواضح ان مفيش فايده ...
No comments:
Post a Comment