ليه بنفسر الناس حسب قوالب فكرية في دماغنا ؟

ليه بنفسر الناس حسب قوالب فكرية في دماغنا ؟! 

الموضوع يبتدي , لما كان في شخض متوحش عايش في غابات أثينا أسمه " بروكرست " , بروكرست حسب الأسطورة اليونانية , كان شخص عنده مشاكل نفسيه و كان بيصب عقده و مشاكله ديه علي الناس اللي بيقابلهم في الغابة .. فكان لما يلاقي حد جديد في الغابة كان بيدخله بيته و أول ما يدخل بيت بروكرست , كان بيحطه علي سرير معين و يظبط الحد ده علي حسب السرير ! فلو طويل شويه يقطع اجزاء منه عشان يناسب السرير !! و لو قصير يفضل يشد في الشخص ده لغايه ما يبقي قد السرير !! لغايه ما جيه بطل أسمه " ثيسيوس " و قتل بروكرست و أنتهت القصة .. علي قد ما القصة ديه بسيطة إلا انها طلعت مصطلح الـ " بروكرستية " و هو أننا نتعامل مع اللي حوالينا علي اساس قالب واحد او سرير ثابت من غير اي اعتبار لحالتهم او مقاسهم .. 

في كتابه ( الأحلام : بين العلم والعقيدة ) بيقول العظيم " علي الوردي " : 

" ينشأ الإنسان عادة في بيئة ذات عقيدة معينة. فهو لا يكاد يفتح عينه للحياة حتى يرى أمه وأباه وأهل بيته وأقرانه يقدسون صنماً أو قبراً أو رجلاً من رجال التاريخ , وينسبون إليه كل فضيلة. وعقل الإنسان ينمو في هذا الوضع حتى يصبح كأنه في قالب , وهو لا يستطيع أن يفكر إلا في حدود ذلك القالب. إنه مقيَد ويحسب أنه حر. ولهذ نجد كل ذي عقيدة واثقاً من صحة عقيدته وثوقاً تاماً , أما المخالفون له فهم متعصبون – تعساً لهم ! " 

و هو ده أساس المشكلة , عدم نشأة الأنسان علي أمكانية وجود المختلف عن ثوابته و عقائده .. فالقالب اللي بنحط فيه الناس التانيه هو نتيجة غرورنا و رفضنا لقبول التعايش مع افكار او اراء تانية تحتمل الصواب زي افكارنا و أراءنا .. و ده أن دل فهو يدل علي فقر و ضعف الأنسان نفسه .. فاللي كان بيعمله بروكرست كان بكل بساطه عشان يقنع نفسه ان سريره لا يمكن يكون مش مناسب لاي شخص ! لا هو مناسب و مقاسته صح جدا ! فالمشكلة دايما في الاشخاص مش في السرير !! و إلا بروكرست مش حيقدر يعيش مع سرير ممكن يكون مش مناسب حد !! 

في النهاية , قوة الانسان مش أنه يتعامل مع اللي شبهه , انما قوته انه يقدر يتعايش مع المختلف .. ففي كل مرة تحس انك ضحية للبروكرستية , و أنك مش قادر تتعامل غير مع اللي زيك او شبهك .. في كل مرة تحس انك مش عارف تتعرف او تحب إلا بعد ما تغيير اللي بتحبهم علي مزاجك و يبقوا ملائمين لمقاسيك و قواعدك .. في كل مرة تحس بغضب او توتر لما حد يعارضك او يختلف معاك و يبقي سلاحك الوحيد التقطيع في الأخر و الترهيب !.. أعرف أن نهايتك حتبقي زي بروكرست لو محدش قدر يقتل افكارك المتسلطة او اراءك المتحكمة , علي اقل تقدير حتعيش شخص كئيب غير سوي .. كائن وحيد غير مرغوب في التعامل معاه .. نهايتك معزوله عن الحياة و شركيك الوحيد حيبقي سريرك البأس العاجز .. الغير قادر علي الدفاع عن نفسه زيك ...

للأسف الصورة ديه مش قادر اوصل لمعلومات كتير عنها غير ان أسمها حسب مدونه ما On your death bed, 2009 , بس الصورة بتعبر ببساطة عن فكرة " البروكرستية "