مروان أتعرف علي ريهام و كانوا منجذبين لبعض بشكل قوي .. كانوا بيخرجوا و يهزروا و كانت الحياة بينهم زي الفل .. فجأة و بدون اي مقدمات , ريهام مبقتش ترد علي مكالمات مروان و لا حتي رسايله علي الـ facebook ! .. مروان حس مره واحدة أن ريهام بتختفي من حياته من غير اي سبب مقنع او تفسير منطقي ... فإيه اللي حصل ؟!
سنة 2013 , دخل مصطلح شعبي جديد علي اللغة الأنجليزية و هو الـ Ghosting , عشان يوصف حالة أختفاء الحبيب او الصديق من حياة شريكه بدون اي تفسيرات , و كأنه بيتحول لشبح !! .. و ممكن الموضوع ده يبقي تدريجي , فيبتدي مثلا أنه ميجيش المواعيد اللي متفقين عليها من غير حتي ما يعتذر او يقفل تليفونه ساعه الميعاد و يحصل اللي يحصل ! ,, لغايه ما يرفض اي شكل من التواصل مع الشخص اللي بيحبه و يتحول من شخص كان بيكلمه كل ساعه لشخص ميعرفش عنه اي حاجة بالشهور ..! .. بس ليه في ناس بتلجأ للـ Ghosting , ليه ريهام عملت كدة في مروان ؟!
في مقالتها Why Ghosting Hurts So Much بتشرح الكاتبة Jennice Vilhauer , ان الناس بتستخدم اسلوب الـ Ghosting , لأسباب كتير منها أنهم بيكونوا مش قادرين يحددوا حقيقة مشاعرهم تجاه الشخص ده , فمثلا , ريهام منجذبه لمروان , بس هي مش عارفه اخر الانجذاب ده ايه ؟! .. هي مبسوطه معاه بس خايفه الموضوع ليطور لحاجة هي مش عامله حسابها .. فبتقرر من تلقأ نفسها تبعد بهدوء متخيله ان كدة بتدي لنفسها وقت للتفكير و برضة بتحمي مروان من المجهول اللي هي مش عارفه ابعاده .. ,, طب سؤال ! هي ريهام مش قادرة تدرك ان اللي بتعمله ده ممكن يأذي مروان ؟! مش عارفه انها لو أختفت مرة من حياته ده حيتعبه مش حيفيده ؟!!
الـ cognitive dissonance (نظرية التنافر ) .. الموضوع ببساطه أن الأنسان لما بيكون عاوز يعمل حاجة معينة , بيبتدي يدور علي اي سند و دلائل عشان يثبت انها صح و ضرورية .. فحتي و لو ريهام من قرارة نفسها عارفة ان قرارها ده ممكن يكون أناني او مش في مصلحة مروان , بس حتفضل تقنع نفسها ان هي بتعمل كده عشن بتحبه و خايفه عليه .. حتخلق وهم أنها لازم تبعد عشان خاطر مروان و ده مش حقيقي ! .. مع أنها لو وقفت مع نفسها دقيقة و راجعت تصرفها ده , حتدرك انها لو فعلا عندها خوف من المجهول او قلق من علاقتها مع مروان , أقل علامة لتقدريها لشكل علاقتهم ديه , هي أنها تناقش مروان و تصارحه بمخاوفها ديه .. مش تهرب و تختفي زي اشباح و تعيش في وهم هي عاوزة تصدقه ...!
في النهاية , الشخص اللي بيكون ضحية الـ Ghosting بيمر بحالة صعبة من الضيق و الخنقة ,, فهو ده تعريف الأحباط أنك تكون عاوز حاجة و تحس بعجز أنك تقدر توصلها .. ساعتها بتحس أنك مسلوب الإرادة و الحرية , أنك بيقت مجرد أداه حد تاني بيحركها علي مزاجه .. زيادة علي كدة شعورك بالرفض الغير مبرر .. طب هي ريهام عملت كده ليه ؟! انا زعلتها في ايه ؟! ازاي الحد اللي كنت واثق فيه و بحلم اعيش معاه يرفض كل محبتي ديه و يقرر يبعد عني ؟! ازاي !!!!؟ .. و هي ديه مشكلة دخولنا في علاقات غير ناضجة , لما يكون الشخص بيتعامل مع حد أضعف و أجبن من انه يتحمل مسؤولية مشاعره .. فنبقي جزء من مراهقته العاطفية و ندفع تمن تعلقنا بيه أحباط و يأس و خسارة ... فمروان لازم يعرف انه مغلطتش في حاجة عشان ريهام تسيبه و تختفي عنه .. أنما الغلطة الاولي هي أنه سلم قلبه و أحلامه و طموحاته لحد مش قادر يواجه او يتكلم بوضوح من الأساس .. فالحب يا يكون ناضج يا أما ميبقاش حب ..
No comments:
Post a Comment