في زمن ظهر فيه اشباه الرجال و الخونه و العملاء ! كان يجب ان يضع كل مواطن مصري شريف لنفسه موصفات حقيقه و شروط واقعيه علي اساسها يكون اختيار رجال المرحله القادمه , و الاهم صفات يتمني ان يجدها في من سيختاره رئيسا لمصر !! , و لذلك وضعت بعض الصفات الاساسيه و الملامح الرئيسيه التي اعتقد وجوب توافرها في من يستحق ان يكون رئيسا لمصر , و الشروط اللازمه التي من خلالها سأحدد شكل و موصفات من اريده رئيسا لبلدي الحبيب مصر :
و هي ديه الشروط :
1- يكون برج الاسد في الابراج الشمسيه او برج الكلب في الابراج الصينيه
2- يكون عدي level 23 في لعبه candy cruche
3- يكون ابن حلال و كسيب و عنده مطرح و امه ست كبيره سمعها علي قدها
4- ميكونش عنده ولاد عندهم اكونت علي التوتير , يفضل لو عنده بنت عندها اكونت علي الفيس بتقبل اي حد
5- مش شرط يكون مصري و لا حتي من ابوين مصريين و مش شرط حتي يكون عاش في مصر اصلا , بس مهم جدا تكون مراته مصرييه و يفضل لو من شبرا
6- يكون بيعرف يقرا و يكتب و يزغط بط و ياكل بالـ chinese sticks
7- مش شرط يكون زملكاوي دلؤتي عشان ممكن منلاقيش , بس علي الاقل جت عليه فتره في حياته كان بيشجع الزمالك لفتره لا تقل عن سنه ميلاديه من غير ما يكون جاله في الفتره ديه اي مرض من امراض القلب او الامراض العصبيه و النفسيه
8- يكون جاب الدرجه النهائيه في ماده صيانه و ترميمات في سنه خامسه ابتدائي و خد اي ماده مستوي رفيع في الثانويه العامه الا الجغرافيا و الانجليزي
9 - اتعرض لعمليه تثبيت واحده علي الاقل و عدد 5 عمليات استجاوب في قسم السلام
10 - يكون ركب اتوبيس 955 خط الهايكستب - التحرير قبل كده و يفضل لو كان ركب الاتوبيس من رمسيس لغايه الهايكستب و نزل ببنطلونه كامل
11- مش لازم يكون شايل اللوز , بس شرط اساسي يكون عامل عمليه اللحميه
12- يكون اتعمله علي الاقل عدد 3485 اغنيه باسمه و شرط اساسي تكون سوما مش مغنيا في اكتر من 1489 اغنيه منهم
13- ميكونش اشتغل لا callcenter و لا medical rep قبل كده
14 - ميكونش لا شارك في ثوره 25 يناير و لا 30 يونيو و لا له اي نشاط سياسي من الاساس و لا حتي نزل انتخابات او استفتاءات قبل كده , و يفضل لو مكنش طلع بطاقه اصلا
15- يكون بيحب anne hathaway , scarlett johansson , monica bellucci , و مدرك ان justin bieber شاب مش تمام ..
16 - يكون قدر يكمل فيلم ليوسف شاهين لاخره قبل كده
17 - يكون بيشرب قهوه الصبح علي صوت فيروز
18 - يكون مقراش الفيل الازرق
19 - يكون بيساعد مراته في توديب الشقه , و يخرجها كل اسبوع علي الكورنيش و يشربها هلابسا
20 - بيكون له اي قريب درجه اولي دخل كليه طب عين شمس و شرط يتكشف علي قواه العقليه (قريبه مش هو )
21- يكون قضي فتره من حياته عاطل , فتره لا تقل عن 20 سنه من عمره , خلال الفتره ديه يكون شرب لا يقل عن 9000 حجر شيشه و 15000 كوبايه شاي
22- يكون عارف اسعار البيره و انواعها و عارف ان ال I.D ده نوع فوديكا مش بطاقه شخصيه
23- يكون رضع طبيعي و امه فطمته علي شيكولاتا مورو او ريد بول
24- يكون راح الوادي الجديد قبل كده
25- يكون بيستحمي علي اقل 4 مرات في الاسبوع في الشتا و مره كل يوم علي الاقل في الصيف اصلها مش ناقصه ناس معفنه هي
No comments:
Post a Comment