“واحسرتاه، إن الحياة ليست بهذه البساطة، إن الفاشية الأصلية قابلة لأن تعود من خلال أشكال بالغة البراءة.”
أمبرتو إيكو ,
ده فيلسوف ايطالي معاصر جدا .. عاش في عصر الحرب العالميه التاينه و اتأثر بالفاشيه بتاعه موسيلني و له مقال مهم جدا بيتكلم عن ازاي الفاشيه مهما كانت بتنتشر في الشعوب ,
المقال ده عشان اللي يحب يقراه بالانجليزي :
بس هو من خلاله طلع شروط عشان تتمم الفاشيه ديه :
1- عباده التقاليد ! و ديه اللي نجحت الثوره الكاثوليكيه علي الثوره الفرنسيه ! بحيث انها كانت حجه الثوره المضاده قصاد التنورين و العقلانين , انهم بفكرهم ده بيهدوا تقاليد المجتمع و عاوزين حاجه ضد المجتمع الاصيل !
2- المثقفين مش بتوع فعل , دول بتوع كلام ! .. ترديد الكلام ده من قبل الفاشين بيخلق نوع من العداء عند اي مجتمع تجاه اي مثقف و تبتدي تظهر علي اي حد مختلف مصطلحات زي ( مخنث - فرافير - سيس و اخيرا العيال بتاعه الدم كله حرام و شمامين الكله !! )
3- قتل اي نوع من انواع النقد التحليلي ! و استخدام عبارات زي (مش وقته - معلش فتره و حتعدي ) و ساعتها يتعبر اي حد بينقد يعني حد خاين !!
4- خلق العدو ! لازم لاي فاشيه يكون في عدو ! و الا الناس حتتمسك في الفاشيه ليه ؟!
5- زي ما حيخلق عدو , لازم يخلق احباط !! و عشان كده معظم اللي بيأدوه الفاشيه من الطبقه المحبطه اجتماعيا و نفسيا , مش لازم يكون فقير او غني .. لا محبط يعني انسان محطم فبيدور علي اي بصيص امل يتعلق فيه .. حد مهان دايما بيدور علي حد يحميه من الاهانه , و يستجمع في الفاشي قوته و يشعر بلذه الانتقام في اللي بيتعرض للفاشيه و تبدأ تطلع مصطلحات زي (اطحن - اقتل - خلصنا منهم كلهم - في داهيه و هكذا ) .. !!
6- الفاشيه بتقدم الهويه لمن ليس لهم هويه ! تقديمهم زي بعد ديني علي شخصيتهم و تحسسهم انهم افضل من الاخرين دينينا فيتمسكوا بيها اكتر , تديهم زي وطنيه و تحمل واجب وطني , فيحسوا انهم بيعملوا حاجه قيمه بعد مماكنش ليهم فايده .. و تلاقي الهويه ديه هي الشخصيه التانيه اللي الانسان بيحيا بيها , بمعني بسيط تلاقي واحد حشاش و بيتفرج علي سكس كل يوم و يروح ينتخب حزب ديني فاشي لمجرد ان بفعله ده , هو حاسس انه اصتبغ بهويه هو نفسه فيها , و يعيش علي امل انه كده حد متدين انه شارك في انتشار الدين بفعله ده و كذلك مع نظريه المؤامره و شعور بهويه وطنيه مزيفه لمجرد سماع اغنيه معنيه للفنان مصطفي كامل !!
7- لازم يخلق مبررات ليه من خلاق تشويه المعارض ليه , زي مثلا عيل فاشل و صايع و لما يسقط في الامتحان يقولك كله سقط , او يقول الامتحان كان صعب اوي او الظروف صعبه .. الفاشي مينفعش يعيش من غير مبررات !
8 - بالنسبه للفاشي , مفيش حاجه اسمها صراع للبقاء , لا ده البقاء ذات نفسه صراع ! الفاشي عمره ما بيخلص حروبه مع اعداه ابدا و عشان كده عمرك ما حتبطل تسمع حربنا مع الفلول او حربنا مع الامركان , حتفضل الحرب ديه شغاله الي ما لا نهايه , و متقلش عنده اللي يخليك تقتنع !
9 -10- الفاشي هو بطل مفيش منه اتنين , هو كائن اسطوري تاريخي يشابه في اسطوريته بيضه طائر الرخ الاسطوريه و كان الشعب كلهم ولاد كلب مفهومش حد عدل غير بسلامته البطل .. و عشان كده الفاشي لازم له نخبه ضعيفه يظهر من خلالها !!
11- لو مت في الدفاع عن الفاشي , انت كمان بطل ! شهيد في سبيل دينك او شهيد في سبيل وطنك ! و لا حتي شهيد في سبيل اي حاجه بس انت موت و ريحنا !
12 - لو معرفش يدعي البطوله , ممكن يلعب بالجنس سواء باغراء او انغلاق ! علي العموم حيلعب بورقه من الاتنين واحده باسم المشاعر و الحنان و التانيه باسم الفضيله و اللعب علي وتر الذكوري السادي !
13- الفاشيه لازم لازم لازم لازم تقسم الشعوب و طبعا الشعوب بنت الكلب بتساعدها في كده !!
14 - الفاشيه بتستخدم مصطلحات معقده و كلام جامد و كبير عشان ترسم علي المواطنين الغلابه اللي مش فاهمين حاجه !
+ اخيرا انا حاولت الخص اهم النقط اللي في المقاله و اصغيها بشكل يرمي علي الواقع , طبعا المقاله احلي مليون مره من اللي كاتبه و فيها شواهد تاريخيه و اجزاء كتير رائعه , بس الصراحه طويله اوي بس بكل لو في حكمه واحده ممكن الواحد يطلع بيها من المقاله هي "ان الشعوب تستاهل اللي حيحكمها " و ان علي رأي عمنا مارتن لوثر كينج :
"مفيش حد بيركب لامؤخذه علي ضهرك غير لو لامؤخذه كنت انت موطي "
و اللي يوطي يستاهل اللي حيرجي ليه
No comments:
Post a Comment