تحت بيت كيرلس ..يستوقفه احد ظباط المباحث و معه عسكري اخر , مرتديان ملابس مدنيه ..
الظابط : بطاقتك يا كابتن ؟؟؟
كيرلس : طب معلش , ممكن اشوف كارنيه حضرتك الاول , اصل حضرتك مش لابس شرطه يعني ؟
الظابط : احنا مباحث يا ابني .. مش بنلبس لبس ميري .. بطاقتك بس بسرعه ؟
كيرلس : عادي يا باشا , بس اشوف الكارنيه بتاع حضرتك ده من حقي يعني ..
الظابط : حقك ... انت يلا شكلك من العيال بتاعه حقوق الانسان و الثوره و الهبل ده (يشير للعسكري معه : هات لي الواد ده )
كيرلس : لا يا باشا , بس اصلي ساكن في العماره اللي ورا حضرتك ديه , و نزلت اجيب بيض عشان البيض اللي عندنا خلص , فمكنتش نازل بالبطاقه , بس ممكن اروح و اخلي ماما تنزلها لي في السابت
الظابط : و بتتأمر و عاوز تشوف الكارنيه , لا يا حنين انت حتيجي معانا القسم و ماما حتبقي تجبيهالك هناك
كيرلس : و طب و ليه يا باشا نتعب ماما معانا ؟
الظابط : انت بتستهبل يا روح امك ؟!
كيرلس : انت قصدي يا باشا , الموضوع مش مستاهل .. و انهارده لسه سامعين كذا خبر فرحوا كل المصريين , فيعني كل سنه و حضرتك طيب و كده
الظابط : خبر ايه يلا ؟
كيرلس : سياده الفريق عبد الفتاح السيسي اترقي و بعد كده سياده المشير عبد الفتاح السيسي استقال و بعد كده سياده المشير عبد الفتاح السيسي اترشح للرئاسه .. ما تمسكوه رئيس بقي يا باشا عشان الفرحه تكمل بقي ؟
الظابط : انت في حمله " السيسي رئيسي " يلا ؟
كيرلس : لا يا باشا
الظابط يشير للعسكري : هاتوه
كيرلس (مسرعا ) : بس في حمله "كمل جميلك " يا باشا ؟
الظابط : و حتدي صوتك لمين يلا ؟
كيرلس : سليم العوا انشالله
الظابط يشير للعسكري : هاتوه
كيرلس (مسرعا ) : بهزر معاك يا باشا , واحد في حمله " كمل جميلك " , حيدي صوته لمين ؟؟ اكيد لقائدنا الكبير سياده المشير عبد الفتاح السيسي
الظابط : مش عارف يلا , حاسس انك بتتريق ؟؟ و شكلك سته ابريل ؟
كيرلس : و لا اعرفهم يا باشا , قبل كده ليا واحد صاحبي عرفت بعد كده ان امه كانت اسرئيليه , المهم قال لي تعالي نروح اجتماع ل 6 ابريل عشان بيوزعوا اكل و فلوس و كده , فخدني مكان كده شكله ماسوني , حتي يا باشا كان علي الحيطان صور لنجمه الماسونيه , اول ما شفت الكلام ده علطول جيه في دماغي مشهد الفنانه ناديه جندي في فيلم فتاه من تل ابيب و حزنت اوي علي نفسي فخرجت بسرعه و حتي بلغت عن صاحبي ده كمان .. خلونا نخلص من اشكالهم
الظابط : لا باين عليك شاب وطني , بس انت عرفت منين نجمه الماسونيه ديه ؟؟
كيرلس : دكتور توفيق عكاشه الله يبارك له , جبها قبل كده في برنامجه و حذرنا منها ..
الظابط : ده انت كمان باين عليك من شباب مصر المثقف , لا روح بيتكوا و سلم لي علي الحجه والدتك و اشكرهلي عشان عرفت تربي شاب محترم زيك , عارف لو في شباب واعي كتير زيك كده ,,, مكانتش حصلت نكسه 25 يناير و العك اللي بيحصل في البلد ده
كيرلس : فعلا يا باشا .. معلش عن اذنك بقي يا باشا , عشان الحق برنامج الدكتور توفيق عكاشه ..
يمر احد اصدقاء كيرلس من 6 ابريل في المنطقه يدعي "اسفنجه " ليجده واقف مع شخصين ,
اسفنجه : ولا يا كيرلس , شفت , مش قلت لك السيسي حيعملها و يترشح
كيرلس : يا عم ما يترشح ! علي اقل حد جدع و راجل و أحسن واحد يمسك مصر
اسفنجه : ده اخره يمسك ..
كيرلس (مقاطعا ) : يمسك العالم كله ! مش مصر بس .. و اللي يقول غير كده , يبقي لا بيحب بلده و لا وطنه
اسفنجه (مستغربا ) : انت مالك يلا يا كيرلس ؟! انت رافع كميا و لا ايه ؟! و اومال فين الثوره و مصر مدنيه و الكلام ده
الظابط مخاطبا اسفنجه : هو انت يا حبيبي 6 ابريل ؟؟
اسفنجه : اه يا باشا , ابريلي و افتخر !
الظابط : و بتنزل مظاهرات و كده ؟؟
اسفنجه (ضاحكا ) : ههه بنزل مظاهرات ! انت عارف اخر مظاهره بتاع حلوان اللي المظاهره جرت العساكر و الظوباط قدمها , اهو العبد لله اللي انت بتكلمه كان بيجريهم قدامه زي الفراخ .. بس هو حضرتك مين ؟؟
الظابط : احنا كنا الفراخ يا روح امك ... هاتوا هما لي ولاد الــ #$%# دول !
No comments:
Post a Comment