لوحه سرياليه للعبقري , salvador dali
بعنوان " the temptation of saint anthony "
او بالعربي "اغواء القديس انطانيوس " ,
القديس انطونيوس , او زي ما يقال عليه في تاريخ الكنيسه القبطي "ابو الرهبان " نظرا انه كان اول من أسس لفكره الرهبنه في تاريخ الطقس الكنيسي بشكل منظم , و يعتبر اول ناسك ( متصوف ) بشكل عام يلجأ للصحرا و يسيب املاكه - مع انه كان غني - , و يسيب حياته الارضيه و يعيش في كهف وحيد بعيد عن العالم , مكرس حياته للتأمل في اللهوت المسيحي و تقرب من الله بشكل روحاني ,
حسب كتب تاريخ الرهبنه في المسيحيه , في قصه مشهور بتكلم عن محاربه الشيطان للقديس انطونيوس , و كانت واحده من اهم الحروب ديه , هي اغواء انطونيوس بخطيه الشهوه ..
في اللوحه ديه سليفادور دالي , بيحاول يجسد الحرب ديه بشكل سريالي رمزي صارخ , لو اي حد ركز في الصوره حيستغرب انه يكتشف انطونيوس موجود في اخر الصوره تحت بشكل مهين بعض الشيئ لواحد المفروض انه قديس مهم في تاريخ الكنيسه القبطيه و لكنه كمان عاري معهوش غير صليب خشبي متواضع الشكل , عكس ظهور الصليب الذهبي المشهور في الفن الاوروبي بتاع العصور الوسطي , انطونيوس العاري الضعيف في مواجهه حيوانات ضخمه كل حيوان منهم بيرمز لخطوه مهمه في عمليه دخول شهوه لفكر الانسان ,
الفيل اللي في اخر الصوره , معلوش اي حاجه غير عمود .. هو بدايه دخول الشهوه في عقل الانسان .. مجرد عمود فاضي
الفيل اللي بعده دخول الشهوه في شكل مخفي , زي صندوق او علبه ذهبيه قيمه و غاليه ..
الفيل اللي بعده , العمود اتغير شكله و بقي شكله غير مألوف , عن العمود الابيض الاصلي
الفيل الاخير , حامل الفتاه العاريه علي كاس , بشكل صريح و واضح
الحصان , بشكله العنيف و القوي , هو قمه و ذروه الشهوه !
اي حد يلاحظ رجل الافيال يلاقيها زي رجل العنكبوت , سهل انها تتكسر و ضعيفه , مش ثابته , انما في المرحله الاخيره , الشهوه اتجسدت في شكل حصان برجله الثابته و قويه ! .. و كذلك هي الشهوه .. لما بتتملك عقل انسان مش بتسيبه بسهوله , بالعكس !
في تأمل تاني في اللوحه , و هو ان انطونيوس ساند علي صخره , مش مجرد صليب بس , لا ده في احتياج سنيد او معين يساعده في حربه ديه .. و الصخره دايما بترمز في الفن السريالي للمبادئ الصلبه ..
اللوحه فيها معاني كتير و تأملات اكتر , كل واحد يفسرها بعنيه و بفكره و هي ديه اجمل حاجه في الفن السريالي عموما , انه علاقه مشتركه بين الفنان و المشاهد , كل واحد يشوف اللوحه بطريقته و ادراكه , و يمكن تفسيري يكون غير تفسير اي حد تاني بيشوف اللوحه , بس الممتع انك جزء كبير من ادراك اللوحه بيكون نابع من عقلك انت ..
فكره صراع الشهوه عموما , سواء ولد او بنت .. هي قصه صراع دائم بين لذه الشر و صعوبه الفضيله , فايهما اسهل ؟! حد يتحرش بواحده و لا يمسك نفسه ؟! حد يشتهي واحده و لا يمسك نفسه؟! يريل علي اي بنت لابسه اي لبس في وجه نظره مثير ! ولا يمسك نفسه ؟! اعتقد دايما الاصعب هو افكره ترويض الشهوه !!
ترويض الشهوه هو الخط الفاصل بين سمو الانسان و حيوانته , طبيعي جيدا كلب في موسم التزواج عاوز "يتكاثر " يهجم علي اي كلبه و يتكاثر ! انما اللي مش طبيعي انه يهذب نفسه و سلوكه لترويض شهويته ديه لوقت و مكان و مناسبه يمكن تكون انسب !! انما لو ابتدي الانسان يبرر شهوته انه مش قادر يمسك نفسه ساعتها يبقي بيفقد اهم سمه بتميزه كانسان و هي الحريه ,!
قصه انطونيوس مثال واضح لتغلب الانسان علي نزواته عموما , مثال واضح لفرض سيطره الانسان علي شهوته , مثال واضح لرفض العبوديه للخطيه ! , تخيل المبررات اللي كانت ممكن تسمح لانطونيوس انها يتمتع و لو حتي بمجرد شويه تفكير شهواني , اولها انه مش كفايه انه في الصحرا , او انه مش حأيذي طرف تاني معايا , لا ده كمان محدش شايفه !! مبررات كتير , بس انطونيوس وسط كل ده , هو .. قرر انه يتحكم في نفسه , مش نفسه هي اللي تتحكم فيه !
الشهوه مش جنس بس (مع انها اوضح صورها ) , بس الشهوه ممكن تكون عبوديه للفلوس , ممكن تكون عبوديه للعنف , ممكن حتي تكون عبوديه لفكره الظهور , الشهوه هي وهم القوه المزيفه , الشهوه هي حاله الضعف امام الرغبه , الشهوه هي الميل او الحاجه اللي كل ما يحاول صاحبها يسدها يلاقيها تفضل تكبر منه لغايه ما في الاخر تتملكه !!
في النهايه , مش مطلوب مننا كلنا نكون قديسين , بس مطلوب مننا اننا منفقدش الانسان اللي جوانا ... و محدش حيوصل للكمال , بس البحث عن الكمال هو جوهر الحياه ذاته ..
No comments:
Post a Comment