نظرية شلة المزز

مني و صوفيا و مارجريت و اشراق .. دول اربع بنات اصحاب اوي , بيروحوا كل يوم الجامعه مع بعض , معروفين بين باقي الدفعه ان دول "شلة البنات الحلوه " او كما يعرف عنها "شلة البنات المُزز " ! ... اي واحد من الدفعه بيشوف الشلة ديه , بيبقي عاوز يكلمهم او يتعامل معاهم ,, بيبقي واقع في سحر جمال البنات ديه ككل !! .. مع ان لو مني او صوفيا او مارجريت او اشراق ,, كل واحده منهم كانت لوحدها مكنش حيبقي في الضجه او الاقبال الفظيع علي كل واحده منهم زي ما هما في مجموعه كده .. و السبب ان جمال الشخص (سواء بنت او ولد ) بيظهر اكتر لما يكون في مجموعه عن ما يكون لوحده , او زي ما بيتعرف بالـ Cheerleader Effect , 

الـ Cheerleader Effect , يمكن احنا بنمارسه من غير ما نركز و بنعجب باشخاص لمجرد تواجدهم وسط مجموعات جميله , مش بناخد بالنا ان نفس ذات الشخص لو انفصل عن المجموعه ديه , ممكن نظرتنا ليه تختلف او ادراكنا لمقدار جماله يقل ,, لكن اللي عارف الموضوع ده و عارف مدي أهميته هو لاوعي الانسان !! و هو اللي بيقود الانسان انه يستغل الـ Cheerleader Effect أحسن استغلال ,, .. كتير اوي بنشوف البنت اللي بتحاول بقوه انها تدخل "شلة المزُز" ديه لمجرد انها تزيد من مقدار جمالها , أو حتي الولاد لو في مجموعه من الولاد وسيمه المظهر في الجامعه , في النادي , أ, حتي في الشغل , بتلاقي تتدافع غير مبرر من باقي الذكور للأنضمام للمجموعه ديه .. الهدف من الكلام ده كله , ان الـ Cheerleader Effect يتم ... بس هو ازاي بيتم ؟؟ 

ببساطه اللي بيحصل , ان الانسان لما بيشوف مجموعه من الاشخاص , بيحاول يعمل زي متوسط لمدي جمال الاشخاص ديه , بمعني ان واحد شاف مجموعه , فيها بنت حلوه اوي و بنت و بنت مش حلوه ,, لاوعيه حيترجم المنظر ده ان المجموعه ككل فيها بنات متوسطه الجمال ... و مهما زاد عدد البنات الجميله , زادت معاها فرصه ان البنات الاقل فرصه في الجمال , تظهر بشكل اجمل و أحلي .. و عشان كده صعب اوي حد يحدد مدي جمال اي شخص وسط مجوعه , عشان غالبا بيكون واقع تحت تأثير الـ Cheerleader Effect ,

و في النهايه , علم النفس بيقولك , ان انتا او انتي لو عاوزين تبانوا حلوين او في شكل أجمل , دوروا علي اي مجموعه فيها افراد جميله نسبيا و ارشقوا معاهم ,, و علي الناحيه التانيه , لو انتا شخص معجب بشكل واحده , او انتي انسانه معجبه بهيئه واحد .. قبل ما تصدروا قراركم الاخير , فكروا تشوفوا الشخص ده بنظره حياديه بعيده عن اي مجموعه او شلة هو موجود فيها , بنظره منزوعه من الـ Cheerleader Effect ...