في فيلم Expendables الجزء الأول , كان فيه مشهد لما النجم Jason statham راح زار حبيبته القديمه , لقي خطيبها الجديد ضاربها , فاتعصب و اتنرفز .. و قرر ياخدها و يروحوا لخطيبها ده و يضربه قدامها عشان ياخد لها حقها و كده , و فعلا عشان Jason statham جامد طحن راح ضرب خطيبها و اصحابه و هدده لو قرب من حبيبته تاني حيموته , و بكده اثبت لحبيبته ديه , قد ايه هي كانت غلطانه لما سابته و هو كان مصدر الحمايه ليها !! ... في الحقيقه Jason statham عنده White Knight Syndrome ..
الـ White Knight Syndrome (متلازمه الفارس الابيض ) ,, في فئه كبيره من الولاد حلمهم ان بدايه معرفتهم بحبهم او شريك حياتهم تكون من خلال فكره ان حبيبهم او شريكهم المستقبلي ده , لازم و ابدا يكون محتاجهم و مش قادر يعيش من غيرهم ! .. بيعتمدوا علي مبدأ ان "حبيبتي لازم تحس قد ايه انا مهم في حياتها , قد ايه هي من غيري ممكن تضيع ! " .. بيعشوا في دور الابطال , المنقذين .. أستايل الافلام العربي , اللي يبعت واحد صاحبه يضايق الواحده اللي بيحبها عشان هو يجي و ينقذها ... أو استايل ان هو يفضل يتفرج من بعيد علي الشخصيه اللي هو معجب بيها , و أول ما يبتدي يلاحظ ضعفها او حاجتها في اي موقف ما , يبتدي يظهر هو زي الشهم الجدع اللي حيخلص لها كل مشاكلها ,, و حتي و لو يقدر يساعدها قبل وقوع المشكله , لا هو مستني المشكله عشان يتبروز هو ..!
مفيش اي مشاكل , انك لما تحب حد , تبقي بتحب تساعده و توقف جانبه .. بس المشكله ان حبك ده يكون بيعتمد دايما انك الحارس , المنقذ , الفارس الابيض ! اللي في حياتها .. و تبقي بترسخ مبدأ ان هي من غيرك و لا حاجه ! ,, و ده طبعا , بيخلي ان في بدايه اي علاقه ليك , حيبقي من أهم شروط انجذابك , هي انها تكون ضعيفه او أقل منك !! .. و المصيبه انها لو مش كده , يبقي مش حتنجذب ليها من الاساس !! , للأسف مصابين الـ White Knight Syndrome , قصص حبهم مش بتكون معتمده علي حبهم للأخر , قد ما حبهم لذاتهم , في كل خطوه بيعملوها بيكونوا عاوزين يسقوا النرجسيه و الغرور اللي جواهم , قبل ما ييهتموا بالمشاعر و التفاعل الحقيقي اللي في علاقتهم مع شريكهم .. بيكونوا شخصيات ضعيفه و هشه , و ده اللي بيخليهم يدورا علي شخصيات اضعف منهم و يمثلوا عليهم الحب .. و لو في يوم من الايام حسوا ان حبيبهم ممكن يبقي اقوي منهم او حتي في مستوي زي مستواهم , بيبذلوا كل اللي يقدورا عليه , عشان يحطموه بكل الطرق , و لو وصلت انه يتحول لعدو بعد ما كان حبيب !!
لو انتا بتحبها بجد , متحرصش انك تساعدها و ترجع توقف من بعيد , انما احرص انها بعد كده ماتحتجكش مساعدتك من الاساس !! شجعها تبقي احسن , شاور لها علي العيوب اللي في شخصيتها و حاولوا تعالجوها مع بعض بصراحه , سيبها هي كمان تنتقدك و تنصحك ازاي تبقي أحسن .. اغلطوا مع بعض , و حلوا مشاكلكوا برضوا مع بعض .. كرسوا مبدأ ان محدش كاسر عين حد او حد اعلي من حد , انما انتوا الاتنين بتكملوا بعض ... أصلها هي مش عاوزك في حياتها عشان محتاجه منك حاجه , انما هي عاوزك في حياتها عشان بتحبك ...
No comments:
Post a Comment