١٤ ابريل .. الوقفه الشعبيه للمطالبه بظهور سياده اللوا عمر سليمان ... اتجمعوا في ميدان التحرير .. اعداد ضخمه ... و تعالي هتاف " يا عمر يا سليمان ، اظهر و بان عليك الامان " ... و الصوت يعلي اكتر و الناس تيجي من كل حته , كله مستني , كله مترقب , كله مستني ظهور سياده اللوا !! .. و فجأه من غير اي مقدمات ، يظهر نور جامد فوق صنيه التحرير .. دخان كتير ، الناس كلهم خافوا و هربوا ، حاله رعب تملكت ميدان التحرير !! بس كان في واحد واقف من بعيد ، واحد مكنش ليه اي علاقه بالموضوع , كان اساسا في وسط البلد بيشتري غيارات و ملابس داخليه ، مجرد طالع علي التحرير عشان يركب اي اتوبيس يروحه بيتهم , و لكنه لما شاف النور من بعيد ،،، قرر يقرب عشان يشوف ايه مصدره .... لقي سحابه نورانيه ماليه التحرير ، ينزل منها ملاك لابس بدله و نضاره سودا و كان اقرع و بشنب ،
كيرلس : و النبي اتصور جنبك !! هي صوره واحده , اوريها للعيال الملحدين اصحابي !!
عمر سليمان : انت عبيط يا ابني !! تتصور ايه و ملحدين ايه !؟ انا سياده اللوا عمر سليمان
كيرلس : ايه ده يعني مش ملاك ! برضه اتصور جنب حضرتك , صوره واحده اوريها للعيال الثورين اصحابي .. بس ثانيه ,, .. بس هو مش حضرتك ميت ؟
سليمان : ايوه يا ابني ميت ، بس مش انتوا اللي حضرتوني ، فنزلت ربع ساعه اهو اشوف عاوزين مني ايه ؟؟
كيرلس : هو الصراحه انا مش عاوز من حضرتك حاجه , بس ممكن نقعد مع بعض و خلاص
سليمان : نقعد مع بعض , ايه ؟! هو انا فضي ليك , يا ابني دي هي ربع ساعه و لسه حعدي علي "عبد الرحيم علي " اقوله علي كام حاجه ,,, اومال منزلني ليه , مدام مش عاوزين حاجه ؟!!
كيرلس : و النعمه يا باشا , مش انا اللي حضرت حضرتك !!
سليمان : خلاص مش مشكله ، انا حعرف مين اللي حضرني و حجيب امه !! انما انت كنت في التحرير بتعمل ايه .. انت كنت في مظاهره !!؟
كيرلس : و رحمتك يا باشا ، انا كنت بجيب غيارات و كلوتات , لا مظاهرات و لا بتاع ,, حتي بص , اهو الكلوتات لسه بكيسها عشان تصدقني !!
سليمان : لا خلاص مصدقك ,، بس مش عاوز لو نزلت تاني اشوفك في التحرير خالص ، مفهوم ؟!!
كيرلس : مفهوم يا باشا و لا حتي رجلي حتهوب رمسيس ،، بس هو حضرتك ناوي تنزل تاني ؟؟؟
سليمان : اه حننزل احضر النهائي بتاع كأس العالم ، ايه انت كنت عاوز حاجه ؟!
كيرلس : هو طلب صغير اتمني لو حضرتك متمنعش ، انا بقول يعني زي ما حضرتك نزلت ، هل ممكن تنزلنا علاء عبد الهادي او مينا دانيال او جيكا او اي حد من اللي فوق ، اهو يكلمنا و يقعد معانا شويه .. ومش عاوزينه ربع ساعه حتي لا ده مجرد خمس دقايق بس ,، يعني نشوفهم و يرجعوا تاني .. يعني لو ينفع تستخدم علاقاتك و تنزلنا اي حد ؟!
سليمان : لا ، مش حخبي عليك ،، صعبه ديه
كيرلس : خلاص ، و لا يهمك يا باشا ، و اهو احسن عشان ميجيش يتحسر هنا ،، طب معلش يا باشا طلب تاني بس ,، معلش انا رخم شويه ، بس كنت عاوز اعرف هي الفنانه صباح حتغادر كوكب الارض امتي ؟!
يصمت عمر سليمان لفتره ... ثم يجيب ...
سليمان : صحيح , انت مقولتليش بقي اسامي اللي عاوزهم ينزلوا من فوق ؟!
No comments:
Post a Comment