لوحه Jupiter and Io للفنان الجميل Antonio Allegri
اللوحه الاصليه هي اللي علي اليمين , اما الجزء اللي علي الشمال , ده انا مكبره لهدف ما حيبان في الاخر ..
قصه اللوحه غريبه شويه .. :
البنت اللي في الصوره ديه هي (Io) ايو , بنت ملك مملكه ارجوس .. كانت في غايه الجمال و البراءه .. بس لحظها التعيس , اعجب بيها ( jupiter ) اللي هو زيوس عند اليونان , و لما حاول يقرب منها هي رفضت ! بس طبعا هو مسكتش و خلي عرافه تكلم ابوها و تقول له ان الاله جوبتير عاوزها ! فطبعا ازاي الاب يرفض للاله طلب !؟! .. فاتفق مع العرافه , انه حيبعت بنته "ايو" الغابه و جوبتير يتصرف معاها هناك (اب واطي )
المهم عمنا جوبتير ده كان متجوز واحده اسمها "هيرا " , هيرا ديه كانت قادره و مفتريه , فخاف لتشوفه مع "ايو" تبهدله و تبهدلها .. فراح اتحول لغيمه سودا عشان يقرب من "ايو" من غير ما حد يشوفه .. (و للعلم مش اول مره علي جوبتير يعمل كده عشان معجب بواحده , عمل كده مع ستات كتير كان معجب بيهم ! )
و هو ده المشهد اللي صوره الفنان "الغيمه السودا اللي هي جوبتر حضنه "ايو" و بتبوسها "
القصه مخلصتش كده .. لا هيرا شافت جوبتير ! .. فجوبتير راح لاحق نفسه و اتحول لسحابه بيضه في السما و حول "ايو" المسكينه لبقره صغيره ! عشان هيرا متشوكش فيهم ... و حسب الاسطوره "ايو" بعد فتره رجعت تاني انسانه ...
تحليل الصوره : (( اللوحه ديه بتجسد الشهوه و الحب في اصعب صورهم ! ))
- جوبتير لما كان عاوز "ايو" , مكنش في اي نوع من انواع الحب موجوده , مجرد شهوه ما , نزوه , رغبه عابره .. هو كل اللي عاجبه في "ايو" شكلها الخارجي و منظرها .. و ده يتنافي تماما مع مقايس الحب , اللي اول حاجه فيها هو معرفه الانسان اللي انا بحبه ده ! جوبتير علاقته مع "ايو" , علاقه طفل صغير شبط في لعبه , عاوزها يعني عاوزها ! جوبتير متكلمش مع "ايوا" , محولش يشوف فكرها ايه , عقلها ايه , يقنعها بنفسه حتي عشان هي كمان تحبه ! .. و لا اي حاجه ... مجرد عاوز يختلي بيها و يعمل اللي حيعمله و بس ! و حصل و جت اللحظه اللي مستنيها جوبتير .. ! و الخاين الغشاش اختلي بالشابه
- "ايو " .. علي النقيض تعاملت مع الوضع بنوع غريب من القبول , متحركتش , معترضتش , محاولتش حتي تعرف ايه ده !! لامؤخذه اتباست عادي و كمان كان بتميل عشان البوسه ترشق علي خدها صح مع انه نفسه جوبتير اللي هي رفضته قبل كده ! بس هي دلؤتي مش بتتعامل مع جوبتير و لا حتي شايفه , هي عايشه حاله حب و مش عاوزه تفوق منها !! ... و هنا السؤال , ايه اللي يوصل "ايو" للمرحله ديه ؟؟ ايه اللي يوصلها انها تتنازل عن حق المعرفه ؟؟ تنازل عن حق الاعتبار انها كيان من حقها تفهم ايه اللي بيحصل ؟؟ تتنازل عن حقها في الرفض ؟! ايه اللي يوصلها للشكل ده من الاستسلام و الضعف ؟! الاجابه هي رغبتها انها " تتحب " !! و يمكن ديه اضعف حاله ممكن الانسان بوجه عام سواء ولد او بنت انه يمر بيها و هي "احتياجه للحب " !! اعتقد "ايو" لو شكت في لحظه ان الحاله اللي هي فيها ديه مش حاله حب , مكنتش كملت ابدا ! انما متعتها باللحظه ديه خلها تتغاضي عن اي حاجه تاني .. سذاجتها وصلتها انها تكون مجرد اداه في ايد جوبتير ... تعطشها للحنان و غباءها خلوها بالشكل المستسلم ده ! عاطفتها و قله رؤيتها للموضوع بعقلانيه , وصلتها انها بعد كل ده تتحول لبقره !!
نيجي بقي للجزء اللي انا مكبره ,
.. اي واحد ممكن يكون بيشوف الصوره ديه من بعيد ممكن ميركزش ان في وش انسان في الغيوم ديه .. و ان ايده حاضنه "ايو "و منعها انها تقع ! و السبب هو انه فعلا واقف بعيد ... و هي ده فكره العلاقه اللي عاوز يوصلها الفنان .. بعيد عن القصه و تفاصيلها .. بس في رساله واضحه باينه اوي في اللوحه ديه و هي ان (( مش لازم المجتمع او الاخر او اي حد واقف بعيد يشوف اي علاقه حب او يحس بيها .. مدام الاتنين اللي عايشين العلاقه ديه هما نفسهم حاسين بيها و شايفين اثارها بنفسهم ! .. )) ..
اللي بيحب بجد مش محتاج يقعد يقول للناس انا بحب .. بصوا عليا ! .. اللي بيحب بجد مش مستني يشوف رأي الناس في حبه ده او يستمد من نظراتهم موافقتهم او رفضهم ! .. مش محتاج يملي الفيس او التوتير كلام خاص جدا بعلاقته , مش محتاج يقحم ناس ملهاش لازمه جوا علاقته ديه لمجرد انهم مش مصدقين علاقته ديه او شاكين فيها ! .. من الاخر اللي بيحب بجد مش محتاج شو اعلامي ! .. العلاقه الحقيقه بتكون مقفوله علي نفسها .. باسرارها , بحواديتها , بحياتها الكامله , اما العلاقه الاي كلام بتاعه الشو الاعلامي بتكون محتاجه ناس من برا عشان يدعموها , شهود عشان يدوها شرعيه .. ناس كتير يتكلموا عنها يمكن ده يحولها حقيقه ! بس مهما بانت قويه او ثابته , مع الوقت بتموت و تختفي زي الغيوم كده ...
اللوحه فيها حاجات اكتر , و اختيار الالوان ممكن يكون ليه دلالات معينه .. كل واحد يشوفها و يتمتع بيها و اللي عاوز يقرا اكتر :
No comments:
Post a Comment