الCompassion Fatigue

كريم و أمجد أصحاب من زمان ,, بس في الفتره الأخيره كريم مر بأزمه نفسيه شديده , دفعته أنه يدخل في حاله أكتئاب جامده ,, أمجد عشان صاحبه كان بيحاول بقدر إمكان يخرجه من الحاله ديه و يعرفه ان لسه في حاجات كويسه تانيه في الحياه نقدر نعيش عشانها .. بس كريم كان عايش حاله الأكتئاب ديه بعنف .. كان كل كلامه مع أمجد مليان يأس و إحباط .. حتي سلوكه تجاه صاحبه اللي بيساعده كان جاف و حاد .. كل الحاجات ديه كان بتخلي أمجد يزهق و يتعب .. لغايه ما أمجد فقد الأمل في كريم و ابتدي يبعد عنه تدريجيا .. و بالرغم من أمجد رجع يركز في حياته و ارتاح شويه من كآبه صاحبه و صعوبه التعامل معاه ,, إلا انه من جواه كان حاسس بذنبه ناحيته .. و كل مره يفتكره يحس انه مساعدوش كفايه او انه مقصر تجاهه كصديق .. أمجد عنده Compassion fatigue 

الـ Compassion fatigue , هو ببساطه شعور الإنسان بالذنب لما يحس انه مش قادر يساعد شخص مسؤول منه او بيخاف عليه ... بس هو ليه الأنسان من الأصل بيحس بالذنب ؟؟ .. خلينا نتخيل شخص عمال يلعب بالموبيل بتاعه لمدة كذا ساعه و يدخل علي النت و يسمع موسيقي و بهدله للبطاريه .. فتلقئيا الشحن بتاعه بيبتدي يقل .. و عشان الموبيل مركز عن الشخص ده .. بيبتدي يبعت له زي تنبيهات خلي بالك الشحن حيخلص .. نفس الفكره ,, في طبيعتنا الأنسانيه بنكون من فتره للتانيه محتاجين التنبيهات ديه .. و اللي بتيجي لنا علي شكل ذنب .. فالذنب هو الشعور الرخم اللي بيقولك ركز شويه و شوف انتا ماشي ازاي و فين .. و ده اللي حصل مع أمجد لما عقله فكره بحاله صديقه الأنتيم كريم .. 

طب مش يمكن فعلا أمجد لا يمكن يساعد كريم و الـ Compassion fatigue ده مش محله ؟؟ ... هنا بقي يجي دور الـ Self-forgiveness (مسامحه النفس ).. أمجد لازم يعرف أنه بشر مش رجل خارق و أمكانيته محدوده .. هو عمل اللي عليه و كان فعلا عاوز يساعد كريم .. و حيفضل يساعده .. بس ممكن يغير الطريقه .. ممكن يفكر في حلول جديده .. ممكن يحاول يغير منظور رؤيته لحاله كريم .. فساعات كتير بيكون الموضوع محتاج قرار عقلاني أكتر ما هو عاطفي .. بس لو فضل عايش بذنب انه قصر في حق صاحبه و ابتدي الذنب يتملك منه .. حيبقي مش بس مش بيساعد صاحبه , لا ده بيضر نفسه كمان .. 

فنظريا , الـ Compassion fatigue شعور صحي و مفيد ,, و يبفكرنا من فتره للتانيه بمبادئنا و أنسانيتنا .. الخوف لما يتحول الذنب ده لعار ! .. ففي مصطلحين ناس كتير بتتلغط في الشعور بيهم و هما الـ Guilt الذنب و بين الـ Shame العار .. الذنب ألم نفسي بسيط نتيجه فعل الأنسان و زي ما يقال What we do أما العار ألم نفسي غير محتمل نتيجه ماهيه الأنسان و زي ما يقال What we are ... لغايه دلؤتي أمجد يتملكه ضيق من فكره انه ساب كريم لوحده , أنه مش بيسأل عليه ,, أنه مش بيفعل تجاه اللي الواجب عليه فعله !! .. أما لو أمجد دخل في مرحله العار الـ Shame حيبقي الألم ناتج بسبب أنه شايف نفسه حقير .. واطي .. ندل .. شايف نفسه حاجه مش قادر يتعايش معاها .. 

في النهايه , الذنب انواع كتير .. و يمكن الـ Compassion fatigue أخفهم .. بس عارف ايه اللي أصعب من ان أمجد يحس بالذنب تجاه كريم ؟؟ .. ان كريم يحس بالذنب تجاه كريم .. لما يحس بالذنب علي أنه مسؤول انه حط نفسه في الموقف ده , او أهانها في التصرف الفلاني .. لما يبقي العار و الذنب وجهين لعمله واحد ! .. و لو في حد يعتقد ان شعور الذنب صعب جدا و مؤلم لدرجه ان الواحد يستحيل يعيش بيه .. فده للأسف لسه مجربش شعور العار ..