الـ Anti-Flirt Club ( نادي ضد المعاكسه )
في أمريكا , حوالي سنه 1923 , مجموعه من البنات عملوا نادي عشان يكون ينادي و يوعي بمشاكل المعاكسه اللي بتتعرض ليها البنات في الوقت ده , و الصوره اللي علي الشمال ديه صوره لاعضاء النادي , اما الصوره اللي علي يمين ديه للأنسه Alice Reighly رئيسه النادي ده ,
النادي ده كان له قواعد بتتقال للبنات اللي بتنضم له , عشان يحاربوا موضوع المعاكسه ده , زي مثلا :
- متغمزيش بعينكي لاي حد , عشان لو غمزتي بعين , ممكن تعيطي بالعين التانيه
- متسمحيش لاي حد كبير في السن انه يحط ايده عليكي او يمثل عليكي دور انه قد ابوكي و الكلام ده , عشان غالبا الناس ديه بتكون اكتر ناس بتعاكس
- متركبيش مع اي حد يقولك تعالي اوصلك بالموتوسكل ! , أكيد مش بيقولك كده عشان يوفر عليكي التعب في المشي ..
- لو راجل انتي متأكده منه اوعي تسيبه عشان تروحي لحد تاني بيعاكسك , اصل احتمال ترجعي متقلايش الاولاني
في قواعد و حاجات كتير بخصوص النادي ده , اللي عاوز يعرف أكتر من هنا :
انا اللي شدني في الموضوع مش قصه الـ Anti-Flirt Club , قد ما شدتني صوره الأنسه Alice Reighly ,, لو أي حد ركز في صورتها حيدرك انها مش الجميله شكلا او الـ sexy اللي أول ما تنزل الشارع كل الناس حتعاكسها , و مع كده هي كانت من أكتر الناس المؤيدين لفكره النادي ده , و اكتر واحده كانت بتشجع البنات علي انهم يتكلموا و ميقبلوش المعاكسه .. و هنا ممكن ييجي في فكر شباب و حتي بنات كتير , هي بتعمل كده ليه ؟! مش يمكن بتعمل كده كنوع من نقص ! او عشان تعيش نفسها في وهم انها جميله و بتتعاكس و كده ؟!!
من حوالي شهر ظهر علي الـ twitter هاش تاج أسمه#feministsareugly (الفيمنست قبيحات ) , و كان اللي ضد الـ feminism عموما , بيكتبوا في الهاش تاج ده , ان البنت الفيمنست ديه بنت ملهاش اصحاب و شكلها وحش و عشان كده عايشين الدور و معقدين ... و للأسف كان رد فعل البنات اللي بتحسب نفسها علي الـ feminsm انهم صوروا نفسهم selfie و نزلوا صورهم عشان يقولوا اننا مش وحشين و لا شكلهم وحش , و فعلا كانت صورهم كلها sexy ,, بس الصراحه اللي عملوه ده , ضد كل ما هو feminism .. و انهم رجعوا تاني فكره شكل البنت في تحديد سواء تتعاكس او لأأ !! نظريا مفيش قانون او قاعده تقول ان البنت اللي مش جميله مش من حقها تدافع عن حقها في انها تمشي في الشارع من غير ما حد يضايقها او يجي عليها .. مش شرط تبقي كاميرون دايز او ان هاثواي , عشان تطالب باحترامها كانسانه قبل اي حاجه ... Alice Reighly , اه ممكن تكون مش جميله في الشكل بمقايس ناس كتير , أو ممكن تكون مقدرتش تدخل التاريخ من اوسع ابوابه زي مارلين مونرو او صوفيا لورن ,, بس علي مستوها و محيط البيئه اللي كانت عايشها فيها , Alice Reighly مثال محترم لاي بنت كانت محتاجه اللي يدعمها و يقدر وجودها كفرد كامل , حر في المجتمع ...
No comments:
Post a Comment