الFriendzone

شادي زميل مروه في الشغل , مع الوقت أبتدي يحس بإنجذاب تجاها , حاول يعبر لها كذا مره عن مشاعره ديه , مروه لاحظت المشاعر ديه في كلام و حركات شادي , بس للأسف مكنتش حاسه ناحيته نفس مشاعر الإنجذاب اللي هو حاسسها ناحيتها , و علي عكس شادي اللي كان عاوز الموضوع يتطور لمرحله أعلي من مجرد إنجذاب بين اتنين زملاء , مروه كانت عاوزه توقف الموضوع ده عشان هي مش حباه يتطور .. شادي بالنسبه لها مجرد زميل شغل مش أكتر .. شادي بالنسبه لها في الـ Friend Zone ,

سنه 1948 , طلع لنا عالم الأحياء Angus John Bateman بنظريته العمليه الـ Bateman's principle , و اللي بتقول نظرا ان الأنثي عندها عدد محدد من البيوضات في مقابل الذكر اللي عنده عدد غير منتهي من الحيوانات المنويه , فده بيخلي الأنثي في إي علاقه تزاوج او ارتباط ليها اليد العلي .. بمعني ان الطبيعه بتدي للست أفضليه أختيار الراجل اللي هي شايفها مناسب ليها , عكس الراجل اللي بيقدم نفسه للأختبار و هو و حظه ,, فاللي حصل مع شادي انه قدم نفسه لمروه , بس مروه مشفتش ان شادي هو الأصلح بيها , و انتهي الموضوع بالنسبه لمروه عند النقطه ديه .. فشادي المفروض يستوعب الموضوع ده , و يحترم قرار مرو بكل هدوء و نُضج و يكمل حياته عادي .. بس اللي حصل ان شادي عاش حاله اكتئاب و يأس فظيعه , شاف كل حاجه في حياته سواد و حزن ,, و فضل محبوس في سؤال "ليه مش أنا ؟! " .. 

الحقيقه , ليه مش أنتا يا أخ شادي ,, عشان أسباب كتير منها انه حسب Helen Fisher في كتابها Why We Love , وضحت ان الناس بتحب لما تستوفي 3 حاجات ( الأنجذاب , الشهوه , التعلق ) , بمعني ان عشان مروه تقع في حب شادي لازم في الأول تنجذب ليه يعني تحس ان في حاجه مميزه تشدها , و بعد كده تشتهي القعده معاه سواء شهوه جنسيه او شهوه عاطفيه المهم عنصر انها تبقي دايما مسبوطه انه حاضر معاها و خلاص , و اخيرا تتعلق بيه , يعني و حتي و هو مش معاها تبقي مش قادره تبعده عن فكرها .. و للأسف حاجات ديه حصلت في شادي بس مش في مروه , و اللي بالمناسبه مش عيب في شادي او غلطه منه , طبيعي ان ناس تتولد بتحب التفاح و ناس تانيه بتحب العنب .. عمرنا ما حنجبر اللي بيحبوا التفاح يحبوا العنب عصب عنهم , و إلا نبقي مرضي و ساديين !! 

حاجه تانيه ,, صدق او لا تصدق , لو شادي كان طيب اوي مع مروه و خدوم , لو كان متواجد و سهل الوصول ليه , لو كانت لذيذ بشكل مفرط ! , كل الحاجات ديه بتزود فرصه دخوله في الـ Friend Zone ؟!! .. الانسان بطبعه مش بيحب الحاجات السهله , إنما بالـ scarcity principle , الانسان بيقع في حب الحاجات اللي صعب يوصلها , و ده بالظبط اللي حصل في شادي , مع كل مره مروه بتتقل فيها عليه , و السبب ان عقله لما بيبذل مجهود عشان يوصلها بيترجم المجهود ده علي اساس ان الهدف اللي وراه حاجه عظيمه جدا لازم يتوصلها ! علي عكس مروه اللي كان شادي بالنسبه لها حاجه حلوه و لذيذه موجوده جنبها من غير ما تبذل اي تعب او مجهود .. فحتي و لو قست عليه , هو كده كده موجود .. فكفايه عليه اوي الـ Friend Zone

في النهايه , شادي ممكن يفضل محبوس في "ليه مش أنا ؟ " وقت طويل , يقعد يتشقلب و يحزن و يسمع "عيد ميلاد حرجي انا " للفنان هاني شاكر , بس الحقيقه ان محدش حيتأثر او يركز معاه اصلا .. او ممكن يستفيد من التجربه ديه و يحاول يطور من نفسه عشان ميبقاش مقيم رسمي في جمهوريه الـ Friend Zone